ДЭЛХИЙН МЭДЭЭ

Австрали 11 дүгээр сард хилээ нээнэ

2021-10-01

Австрали 11 дүгээр сараас эхлэн олон улсын хилээ нээж, 18 сарын хугацаанд анх удаа вакцинд хамрагдсан аялагчдыг тус улсад нэвтрүүлэхээр болж байна. Түүнчлэн вакцинжуулалтын түвшин 80-аас дээш хувьд хүрсэн мужууд аяллын эрх чөлөөг эдэлнэ гэж Ерөнхий сайд хэлэв. Харин тус улсын томоохон агаарын тээврийн компаниуд үйлчилгээгээ хурдан нэмэгдүүлэхэд бэлэн биш байгаагаа анхааруулжээ.

Одоогоор зөвхөн Австралийн иргэд, онцгой шаардлагатай хүмүүс л хилээр нэвтрэх боломжтой. Мөн зайлшгүй ажил хийх эсвэл гэр бүлийн гишүүн нь нас барсан зэрэг онцгой шалтгаанаас бусдаар гадагш явахыг хориглож байна. Энэхүү бодлогын тусламжтайгаар ковидын дэгдэлтийг хяналтандаа авахад тусалсан гэж үздэг боловч үүний улмаас олон гэр бүлүүд удаан хугацаанд тусгаарлагдаад байгаа юм.

Ерөнхий сайд Скотт Моррисон баасан гарагт сэтгүүлчдэд өгсөн ярилцлагадаа “Австраличуудад амьдралыг нь буцааж өгөх цаг болсон” гэжээ.

Австрали улсад одоогоор мөрдөж байгаа журмын дагуу аялагчид зочид буудалд 14 хоног тусгаарлагддаг бөгөөд энэ нь 3,000 австрали долларын төлбөртэй байдаг. Энэ журмыг үе шаттайгаар арилгаж, оронд нь вакцинд хамрагдсан аялагчид долоо хоногийн гэрийн тусгаарлалтад хамрагдахаар болж байна.

Вакцинжуулалтын 80 хувийн босго нь Австрали улс хөл хорионоос гарч, вирустай амьдрах төлөвлөгөөний нэг хэсэг юм. Сидней хотын харьяалагддаг Шинэ Өмнөд Уэльс муж хэдхэн долоо хоногийн дараа уг хувийн босгыг давсан анхны муж болох гэж байна.

Эх сурвалж: BBC