АНУ Украины асуудлаар Оростой ахиц дэвшил гаргаж байгааг Трамп мэдэгджээ

Ням гарагт АНУ-ын Ерөнхийлөгч Доналд Трамп Орос, Украины дайныг зогсоох яриа хэлэлцээрт засаг захиргаа нь ахиц дэвшил гаргаж байгааг мэдэгджээ.

Трамп Оросын Ерөнхийлөгч Владимир Путинтэй харилцаа холбоотой байгаагаа хэлсэн ч яриа хэлэлцээр хэрхэн өрнөсөн талаар сэтгүүлчдэд хэлэхээс татгалзсан байна.

Тэрээр цааш нь “Бид Украин-Оросын дайныг зогсоохын тулд ахиц дэвшил гаргаж байгаа... Бид хоёр талтай ярилцаж байгаа” гэж хэлжээ.

Энэ нь 2022 оны эхэн үеэс хойш Путин болон АНУ-ын ерөнхийлөгчийн хооронд өрнөсөн албаныхны хүлээн зөвшөөрсөн анхны яриа хэлэлцээр юм.

Баасан гарагт “New York Post” сонинд өгсөн ярилцлагадаа Трамп мөн Путинтэй хэдэн удаа ярилцсанаа, хамгийн сүүлийн яриа хэзээ болсныг хэлэхээс татгалзсан байна.

Энэ үеэр, Кремлийн хэвлэлийн төлөөлөгч Дмитрий Песков “Тасс” төрийн мэдээллийн агентлагт мэдээлэл өгөхдөө “олон төрлийн харилцаа холбоо бий болж байна” гэж мэдэгджээ. 

Гэхдээ яриа хэлэлцээрийн агуулгын талаар асуухад “Миний мэдэхгүй зүйл байж магадгүй. Тиймээс энэ тохиолдолд би үүнийг баталж ч, үгүйсгэж ч чадахгүй” хэмээн хариулсан байна.

АНУ-ын Үндэсний аюулгүй байдлын зөвлөх Майк Вальц мөн нэг ярилцлагынхаа үеэр “Маш олон чухал яриа хэлэлцээр өрнөж байгаа” гээд, хоёр улсын харилцааны талаар тодруулахад дэлгэрэнгүй мэдээлэл өгөхөөс татгалзжээ.

Трамп дайныг дуусгах хүсэлтэй байгаагаа удаа дараа илэрхийлж байсан бөгөөд энэ асуудлаар Путинтэй ойрын хугацаанд уулзах төлөвтэй байгааг албаныхан хэлж байгаа.

Трамп Путинтэй “тохиромжтой цаг нь ирэхээр уулзана” гэж ням гарагт сэтгүүлчдэд хэлсэн бол Оросын эх сурвалж уулзалтыг энэ сард эсвэл ирэх сард болж магадгүй гэж мэдэгдсэн.

Мөн Оросын зүгээс уулзалтыг Саудын Араб, Арабын Нэгдсэн Эмират улсыг дээд хэмжээний уулзалт хийх боломжтой газар гэж үзэж байгааг “Reuters” эх сурвалжаас иш татан энэ сарын эхээр мэдээлсэн билээ. 

Ойрын өдрүүдэд АНУ-ын төрийн нарийн бичгийн дарга Марко Рубио, Батлан ​​хамгаалахын сайд Пит Хегсет, дэд ерөнхийлөгч Ж.Д.Вэнс, Украины дайны асуудлаарх тусгай элч Кит Келлогг зэрэг АНУ-ын албаны хүмүүс дайны талаар хэлэлцэхээр Европыг зорих гэж байна. 

Эх сурвалж: Reuters