НИЙГЭМ

“Энэрэл” ЭМНЭЛГИЙН ГАДАА АМИА АЛДСАН Д.Рагчаадорж гэж хэн байсан бэ

Талийгаач Д.Рагчаадорж.

Таны аав ээж, ах дүү, үр хүүхэд гээд хайртай дотны хэн нэгэн чинь эмнэлэгт үзүүлнэ гэж гараад дахин хэзээ ч ирэхгүйгээр явчихвал та яг яах вэ. Тусламж хүсээд очсон түүнийг чинь эмнэлгээс эмнэлэг дамжуулж бахардуулаад анхан шатны тусламж ч үзүүлэлгүй цаг гаран “тамлаж” амь насанд нь хүрсэн тохиолдолд яах байсан бэ? Төрсөнөө алдсан та яав ч зүгээр суухгүй нь лавтай…

Яг ийм эмгэнэлтэй үйл явдал өнгөрсөн долдугаар сарын 3-ны өдөр Баянзүрх дүүрэгт байрлах “Энэрэл” эмнэлгийн гадаа болсон. 35-хан настай, эд бүтээх насны идэр залуу коронавирусийн халдвар аваад бие нь хүндэрч нэг л биш санагдахад эмч, эмнэлэг хоёрт найдаж бараадсан байдаг. Харамсалтай түүнд хэн ч туслалгүй халуун амийг нь тасалж орхисон.

Эмнэлгийн анхан шатны тусламж авсан бол амьд байх боломжтой байсан гэх Шүүх эмнэлгийн дүгнэлт бий.

Хэрэг болсон өдрөөс хойш хэд хоног цахим орчин яг энэ асуудлаар доргив. Монгол хүний үнэ цэн, эрүүл мэндийн салбарынхны хайхрамжгүй байдал, хүнд суртлын талаар ам уралдан шаагив. Харин өнөөдөр бид асуудлыг огт болоогүй юм шиг мартаж, амьдарцгааж байна. Энэ л манай нийгмийн гаж тогтолцооны орших үндэс нь болж байгаа билээ.

Нөгөө талаар үхсэн хүн үг хэлж чадахгүйн зовлонг зарим албан тушаалтан овжноор ашиглав. Хохирогчийг орон сууцны зоорийн давхарт амьдардаг байсан архичин мэтээр нийгэмд ойлгуулж орхиод асуудлыг намжаав.

Тодруулбал, энэ хэргийн талаар долдугаар сарын 4-нд Нийслэлийн эрүүл мэндийн газрын дарга Б.Бямбадорж олон нийтэд мэдээлэхдээ “Өчигдөр харамсалтай үйл явдал боллоо. Талийгаачийн ар гэрт эмгэнэл илэрхийлж байна. Талийгаач Чингэлтэй дүүргийн зургадугаар хорооны …р байранд ажиллангаа амьдарч байсан. Үндсэн захиргаа Баянзүрх дүүргийн 28 дугаар хороо. Хэсгийн ахлагчийн өрхийн эмчид мэдээлсэн мэдээллээр тухайн газарт алтны дархан хийж хоёр хүн ажиллаж, амьдардаг. Амьдардаг өрөөний нөхцөл маш тааруу. Орон сууцны зоорийн давхарт байрладаг. Сүүлийн 10 хоног согтууруулах ундаа байнга хэрэглэж байсан гэсэн ийм өгүүлэмж өгсөн” гээд НЭМГ-ийн Эмнэгийн тусламжийн хэлтсийн дарга М.Мөнхдэлгэр, “Энэрэл” эмнэлгийн дарга А.Амартүвшин, Яаралтай тусламжийн 103 төвийн дарга Ц.Пүрэвдаш нарыг ажлаас нь чөлөөлөх арга хэмжээ авч байгаа гэж мэдэгдсэн. Гэвч энэ шийдвэрийн дараа ч “Энэрэл” эмнэлгийн дарга А.Амартүвшин ажлаа хийсээр байсан нь Монголд хууль нь гууль болсоны нэг жишээ юм.

Тэгвэл “Энэрэл” эмнэлгийн гадаа амиа алдсан Д.РАГЧААДОРЖ гэж хэн байсан бэ?

Д.Рагчаадорж 1986 онд Завхан аймагт төрсөн. Арван жилийн сурагч байхаас урлагт сонирхолтой дуулдаг, сийлбэр хийж тэмцээн уралдаанд идэвхтэй оролцдог, амжилт гаргадаг хүүхэд байжээ. Мөн ЕБС-д суралцахынхаа хажуугаар Хүүхдийн урлан бүтээх төвийн сийлбэрийн ангид суралцаж, төгсөхдөө өөрийн сийлсэн “Найман шарга” бүтээлээрээ тэргүүн байр хүртэж байсан нэгэн. Өөрөөр хэлбэл, гарын ур дүйгээр хэнээс ч дутахгүй, өөрийнхөө амьдралыг аваад явчихдаг, хийж бүтээх хүсэл тэмүүлэлтэй залуу байв.

Мөн хүүхэд байхдаа МУСГЗ, хөгжим судлаач Ч.Буянхишигийн удирдлаган дор “Улаан бүч” чуулгад дуулдаг байсныг нь ойр дотныхон нь дурссан. Хар багаас соёл урлаг, сийлбэрийн ухаанд суралцаж өссөн тэрбээр арьсаа хамгаалах гэсэн хэн нэгэн даргын хэлсэн шиг “архичин” байсангүй, байгаагүй аж.

Зүүн гар талаас эхнийх нь Д.Рагчаадорж.

Д.Рагчаадорж баг хамт олноороо Төрийн өндөрлөгүүдэд зориулсан 16, 8 ханатай гэр сийлж байсны зэрэгцээ чулуугаар шатар, шатрын хөлөг, төмөр, мөнгөөр сэлэм зэрэг бүтээл хийдэг уран бүтээлч, сийлбэрчин хүн төдийгүй өөрийн амьдралыг тов хийтэл аваад явчихдаг хөдөлмөрч нэгэн байжээ.

Энэ талаар талийгаачийн дүү Д.Рэгзэдлхам “Нийслэийн эрүүл мэндийн газрын дарга Б.Бямбадорж олон нийтэд мэдэгдэл хийхдээ миний ахыг тухайн үед архи уусан байсан, архичин бөгөөд зоорийн давхарт амьдардаг хэмээн мэдэгдсэн. Ах минь архины хамааралтай нэгэн байгаагүй.

Миний ах арван жилд байхаасаа урлагт сонирхолтой дуулдаг, сийлбэр хийдэг тэмцээн уралдаанд идэвхтэй оролцож амжилт үзүүлдэг хүүхэд байсан. Хүний үндэс угсаа, юу бүтээж, юунд зорьж, тэмүүлж байсныг мэдэхгүй байж доромжилж болохгүй. Сийлбэр хийхэд дуу чимээ ихтэй учраас хөрш айлуудад хүндрэлтэй байдаг. Тиймээс төмөр, чулуу, модоор бүтээл хийдэг дархчуудын урлан ихэвчлэн орон сууцны B1 давхарт юм уу, зусланд байх нь элбэг. Өөрөөр хэлбэл, хүнээс зайдуу. Тийм учраас ах минь зоорийн давхарт ажлаа байрлуулсан юм. Энэ мэт нарийн ширийн учрыг нь мэдэхгүй байж хүн гүтгэж болохгүй.

Талийгаач Д.Рагчаадоржийн дүү Д.Рэгзэдлхам.

“Энэрэл” эмнэлэгийн зүгээс бидэнтэй ямар ч холбоо бариагүй төдийгүй уучлалт гуйж, эмгэнэл илэрхийлээгүй.  

Манай гэр бүлийн зүгээс Ерөнхийлөгч, Ерөнхий сайд, УОК, НОК, ХЭҮК зэрэг олон газарт өргөдөл өгсөн. Үүнээс ХЭҮК-оос хүлээн авч уулзана гэсэн хариу ирсэн боловч уулзалт товлосон хүн нь коронавирус туссан гэх шалтгаанаар хойшлоод байгаа.

Цагдаагийн байгууллага хэргийг хүлээж авсан ч хэргийг мөрдөж байсан байцаагч ээлжийн амралтаа авч байгаа гэх шалтгаанаар хоёр ч удаа солигдоод байна. Мөн хэрэг прокурор дээрээс хоёр удаа буцсан. Үүний шалтгаан нь мөрдөн байцаалт дутуу хамт байсан үеэлээс нь тодруулж авах зүйлс байгаа, задлангийн эмчийн мэдүүлэг дээр шинжээч эмч томилно гэсэн хариу өгөөд байна” гэсэн юм.

Энэ мэтээр иргэний амь энэ улсад үнэгүйдэж дууслаа. Монгол Улсын иргэн би, чи, та эрүүл мэндийн салбараасаа тусламж авч чадахгүй, эндэж үхдэг байдал одоо цагийн байдаг л нэг зураглал болчихвол тусгаар Монгол Улс гэж байхын хэрэг бий юү?

Талийгаач Д.Рагчаадоржийн бүтээлээс…

9 сэтгэгдэл

  1. Зочин

    2021-09-15

    Бямбадорж ажлаа өгөх учиртай.Энэ нөхөр зоорийн хэсэгт амьдардаг учир хохино гэсэн байгаа.Ийм төрийн албан хаагч тангараг өргөсөн эмч байж таарахгүй.Зайлуулахыг шаардацгаая.Яагаад яаралтай тусламж үзүүлээгүйг шалгахын оронд нас барсан нөхөр муухан амьдралтайг сураглаж яваа албан тушаалтанг өршөөх үндэсгүй шүү

  2. Зааяа

    2021-09-15

    монгол хүний амь нас үнгүйдж хэн нэг эрх мэдэлтэн хүнийг дорд үзэж амныхаа зоргоор ярьж хэлж болохгүй ямар ч байсан хариуцлга нэхэх нь зүйтэй

    • зочин

      2021-09-16

      Нэр төрийг нb цэвэрлэж өгөх хэрэгтэй

      • Б

        2021-09-16

        Төрийн ажлыг хийж чадахгүй байгаа хүмүүс нь зайгаа тавиач…

    • Ганаа

      2021-09-17

      Хийж бүтээдэг ид залуу насандаа хариуцлагагүй хэдэн хүмүүсээс болж хайран сайхан амиа алдлаа ар гэрт нь нөхөн олговор олгох хэрэгтэй шдээ ядахдаа

  3. Б

    2021-09-16

    …хэн байсан ч эмнэлгийн тусламж авах эрхтэй, тусламж үзүүлэх үүрэгтэй… хариуцлага тооцох хэрэгтэй…

    • зочин

      2021-09-16

      Хүнийг хэн гэдгийг нь мэдэхгүй ингэж ярьж болохгүй залруулга хийж, хариуцлагагүй эмч ажилтанд хариуцлага тооцох хэрэгтэй хүний амь нас хохирчихоод байхад хаацайлж хмгаалсаар байх уу?

  4. Мандах

    2021-09-16

    Үнэхээр харамсмаар хэрэг болсон нэр төрийг нь сэргээх хэрэгтэй Энэ улсад амьд явах баталгаа алга

  5. Zochin

    2021-09-16

    Hytad uhehed yalaa yrunhii said n huuli zuin said guij ochood uilj unjaad haruusch gansraad bsaniig olon tumen harsan MAN.haniig demjeedbdag ulsuuniig zuwgeh boluu bas l umuuruh boluu

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet