ДЭЛХИЙН МЭДЭЭ

1950-иад оноос хойш Францын Католик сүмүүдэд 3,000 педофил ажиллаж байжээ

1950 оноос хойш 3,000 орчим педофил (бэлгийн дур сонирхлын үүднээс хүүхдэд татагддаг эмгэгтэй хүн) Францын Католик сүмүүдэд ажиллаж байсан болохыг хүүхдийн бэлгийн хүчирхийллийн хэргийг судалж буй хараат бус комиссын дарга мэдэгджээ. Сүм, шүүх, цагдаагийн газрын архив, гэрчүүдтэй хийсэн ярилцлагад үндэслэсэн 2,500 хуудас бүхий Францын Католик сүмүүд дэх хүүхдийн бэлгийн хүчирхийллийн хэргийн тайланг мягмар гарагт нийтлэх юм.

Хууль зүйн чиглэлээр мэргэшсэн 22 мэргэжилтэн, эмч, түүхч, социологич, теологич (шашны номлогч)-оос бүрдсэн энэхүү комиссыг Францын Католик Сүмийн захиалгаар 2018 онд байгуулсан. 2019 оны зургадугаар сараас эхлэн 17 сарын хугацаанд хохирогчид болон гэрчүүдэд зориулсан шуурхай утсыг ажиллуулсан бөгөөд үүнд 6,500 дуудлага ирсэний дагуу хохирогчидтой холбоо тогтоож, хамтарч ажилласан байна.

Тайланг нийтлэхээс өмнө комиссын дарга Жан Марк Сауве “AFP”-д өгсөн ярилцлагадаа мөрдөн байцаалтын явцад хамгийн багаар тооцоолбол 2,900-3,200 орчим педофил номлогч эсвэл сүмийн бусад гишүүдийг илрүүлсэн гэж мэдэгдэв.

Мөн Жан Марк Сауве Францын “Le Monde” сонинд өгсөн ярилцлагадаа хэлэхдээ эрүүгийн хэрэг үүсгэж болох 22 хэргийн нотлох баримтыг прокурорт шилжүүлсэн гэжээ.

Харин сүм гэмт хэрэгтнүүдийн эсрэг яг ямар арга хэмжээ авах нь тодорхойгүй хэвээр байгаа бөгөөд хүчирхийлэл нь Францын хөөн хэлэлцэх хугацаанаас хэтэрсэн тул олон тохиолдолд яллах магадлал багатай байж магадгүй юм.

Өнгөрсөн жил Францын Католик шашны номлогч, 75 настай Бернард Прейнат 1971-1991 оны хооронд асрамжиндаа байсан 7-14 насны скаут хөвгүүдэд бэлгийн хүчирхийлэл үйлдсэн хэргээр таван жилийн хорих ял оноосон юм. Түүнийг анх 1991 онд буруутгаж, скаутын бүлгүүдийг удирдахыг хориглосон боловч уг хэрэг 2015 онд олон нийтэд ил болох хүртэл тэрээр сүм хийдүүдэд эрх мэдэл бүхий албан тушаал хашиж, хүүхдүүдэд хичээл заасаар байжээ.

Эх сурвалж: The Guardian

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet