Оросоос АНУ-д суух шинэ элчин сайд өнөөдөр итгэмжлэх жуух бичгээ өргөн барих гэж байна

Өнөөдөр Оросоос АНУ-д суух шинэ Элчин сайд Доналд Трампын засаг захиргаанд итгэмжлэх жуух бичгээ албан бусаар өргөн барих гэж байгааг АНУ-ын Төрийн департамент лхагва гарагт мэдэгджээ.

Элчин сайдаар саяхан томилогдсон Александр Дарчиев 2:15 цагт Итгэмжлэх жуух бичгээ өргөн барих бөгөөд Төрийн департаментын мэдэгдэлд өгүүлснээр Европ, Евразийн асуудал эрхэлсэн товчооны ахлах ажилтан Луис Л.Боно арга хэмжээнд оролцох гэнэ. 

Өмнөх Элчин сайд Анатолий Антоновын бүрэн эрхийн хугацаа өнгөрсөн аравдугаар сард дууссанаас хойш АНУ-д Москваг төлөөлөх албан ёсны элчин сайдын суудал хоосон байсан юм.

Шинээр томилогдсон элчин сайд өмнө нь Оросын Вашингтон дахь Элчин сайдын яаманд хоёр удаа удаан хугацаагаар ажиллаж байсан бөгөөд 2014-2021 онд Канадад Элчин сайдаар ажиллаж байсан туршлагатай байна. Тэрээр Оросын бусад өндөр албан тушаалтнуудын адил АНУ болон барууныхныг олон нийтэд хатуу шүүмжилдгээрээ алдартай нэгэн аж.

Хоёр улс сүүлийн үед дипломат харилцаагаа сэргээх, Украины дайныг дуусгах асуудлаар дараалсан уулзалтуудыг хийж байгаа.

Мөн АНУ-ын Ерөнхийлөгч Доналд Трамп Оросын Ерөнхийлөгч Владимир Путинтэй уулзах хүсэлтэй байгаагаа илэрхийлсэн бөгөөд уулзалт нь 2021 оноос хойших Орос, АНУ-ын удирдагчдын анхны уулзалт болох юм.

Эх сурвалж: Reuters