Украины дроны довтолгооны улмаас Оросын Тверь мужийн оршин суугчдыг хэсэгчлэн нүүлгэн шилжүүлжээ

Оросын Тверь мужийн баруун хэсгийн Торопец хотод Украины дроны довтолгооны улмаас гал гарч, оршин суугчдыг хэсэгчлэн нүүлгэн шилжүүлсэн болохыг бүс нутгийн эрх баригчид лхагва гарагт мэдэгдэв.

Мужийн захирагч Игорь Руденя хаана гал гарсныг тодорхойлоогүй ч р гал сөнөөгчид галыг унтраахаар ажиллаж байгааг мужийн захиргааны “Telegram” сувгаар мэдэгдсэн байна.

Торопец нь Оросын нийслэл Москвагаас баруун хойд зүгт 380 км, Украины хилээс хойд зүгт 470 км зайд оршдог.

11 мянга гаруй хүн амтай 1000 жилийн настай Торопец хотод пуужин, сум, тэсрэх бодис хадгалах зэвсгийн агуулах барьж байгаа талаар “РИА” агентлаг 2018 онд мэдээлж байжээ.

Тверь мужид болсон халдлагын улмаас хүний ​​амь нас хохирсон талаар мэдээлэл одоогоор байхгүй байна. 

Торопецкий дүүрэгтэй хил залгаа оршдог Западнодвинскийн дүүрэгт сургууль, цэцэрлэгүүдийг онлайнд шилжүүлсэн болохыг тус дүүргийн захиргаа олон нийтийн “ВКонтакте” сүлжээнд мэдэгдэв.

Оросын агаарын довтолгооноос хамгаалах ангиуд өнгөрсөн шөнө Оросын баруун таван бүсэд Украины 54 дроныг устгасан гэж Оросын төрийн мэдээллийн агентлагууд Батлан ​​хамгаалах яамнаас иш татан мэдээлсэн байна.

Украин сүүлийн хоёр жилийн хугацаанд дотоодын дроны үйлдвэрлэлээ нэмэгдүүлснээр Оросын нутаг дэвсгэрт өгөх халдлагаа нэмэгдүүлээд байгаа.

Есдүгээр сард Украины Оросын нийслэлийг онилсон хамгийн том дроны халдлагын улмаас дор хаяж нэг хүн амиа алдаж, байшин барилга нурж, Москвагийн нисэх онгоцны буудлуудын нислэг саатсан юм.

Эх сурвалж: Reuters