Өмнөд Солонгос улс Хойд Солонгосын хил дээр чанга яригчаар дахин суртал нэвтрүүлж эхэллээ

Хойд Солонгос Өмнөд рүү агаарын бөмбөлгөөр хог хаягдал илгээсний хариуд Өмнөд Солонгосын арми өнгөрсөн шөнө чанга яригчаар суртал нэвтрүүлснээ баасан гарагт мэдэгдлээ.

Өмнөд Солонгосын идэвхтнүүд олон жилийн турш Хойд Солонгосын эсрэг суртал ухуулгын хуудас илгээж ирсэн ч чанга яригч болон агаарын бөмбөлгүүд нь хоёр Солонгосын хооронд хурцадмал байдлын шинэ эх үүсвэр болоод байна.

Тавдугаар сараас хойш Хойд Солонгос хогийн уут дүүжилсэн хоёр мянга гаруй агаарын бөмбөлгийг Өмнөдийн хилийг давуулан хөөргөсөн нь энгийн иргэдийн амьдардаг бүсэд унаж, эд хөрөнгийн хохирол учруулсаар байгаа юм.

Хог илгээхээ зогсоохыг удаа дараа сануулсны дараа Өмнөд Солонгосын арми Умардын хил дээр суурилуулсан том чанга яригчаар суртал ухуулга, дэлхийн мэдээ, К-поп хөгжмийг дахин нэвтрүүлж эхэлжээ.

Хойд Солонгос өмнө нь ухуулах хуудас, чанга яригчийн хариуд ширүүн хариу үйлдэл үзүүлж байсан.

Цэргийн албан тушаалтнууд болон идэвхтнүүд чанга яригчаар суртал нэвтрүүлэхийг сэтгэл зүйн дайны үр дүнтэй хэлбэр гэж үздэг ч 2018 онд байгуулсан хэлэлцээрийн дагуу зогсоогоод байсан юм.

Гэвч хоёр орны харилцаа дахин хурцадсан үед хэлэлцээр хүчингүй болсон гэж хоёр тал үзэж байна.

Эх сурвалж: Reuters