ГОВЬ-АЛТАЙ: "Алтайд үйлдвэрлэв" борлуулалтын төвийг шинээр нээлээ

Орон нутгийнхаа жижиг дунд үйлдвэрлэл эрхлэгчдийн бараа бүтээгдэхүүнийг худалдан борлуулах "Алтайд үйлдвэрлэв" борлуулалтын төвийг шинээр нээлээ.

Говь-Алтай аймгийн Хөдөлмөр халамжийн үйлчилгээний газар нь орон нутгийн баялаг бүтээгчдийн бараа, бүтээгдэхүүнийг сурталчлан таниулах, үйлдвэрийн үнээр худалдан борлуулах, борлуулалтад нь дэмжлэг үзүүлэх зорилгоор 2018 онд “Алтайд үйлдвэрлэв” борлуулалтын төвийг анх байгуулсан юм. Тус төвөөр 21 ААН, байгуулага, иргэдийн 50 гаруй бүтээгдэхүүнийг үйлдвэрийн үнээр худалдан борлуулж байгаа аж.

Орон нутгийн баялаг бүтээгчийн хүсэлт, эрэлтэд үндэслэн "Алтайд үйлдвэрлэв” борлуулалтын хоёрдахь төвийг нээжээ. 

Тус төвийн нээлтийн арга хэмжээнд Хөдөлмөр халамжийн үйлчилгээний газрын дарга Д.Баттайван, аймгийн ЗДТГ-ын Нийгмийн бодлогын хэлтсийн ахлах мэргэжилтэн Л.Ариунтуяа болон орон нутгийн баялаг бүтээгч, үйлдвэрлэл эрхлэгчдийн төлөөлөл оролцлоо. 

Шинэ төв "Мичид" рестораны хойд талд байрлах "Сутай хайрхан" дэлгүүрийн зүүн талд байрлаж буй бөгөөд Алтай нутгийн ард иргэд та бүхнийг орон нутгийн баялаг бүтээгчдээ дэмжин, худалдан авалт хийхийг уриалав.