Орос улс Украин дахь байлдааны ажиллагаанд Афганистаны тусгай хүчний цэргүүдийг элсүүлж байна

Орос улс Афганистаны үндэсний армийн командын корпусын гишүүдийг Украинд байлдуулахаар элсүүлж байгаа тухай “Foreign Policy” мэдээлэв.

Эдгээр нь АНУ-ын Тэнгисийн цэргийн тусгай ажиллагааны үндсэн хүчин болон Британийн зэвсэгт хүчинд бэлтгэгдсэн дайралт хийхээр тусгайлан бэлтгэгдсэн цэргүүд (командо) юм. 2021 оны наймдугаар сард Талибан Афганистанд хяналтаа тогтоож, АНУ тус улсаас цэргээ татахад 20,000-30,000 сайн дурын ийм цэргүүд тус улсад үлджээ.

АНУ нь Афганистаны үндэсний батлан ​​хамгаалах, аюулгүй байдлын хүчнийг байгуулахад 90 тэрбум доллар зарцуулж байв.

“FP”-ийн мэдээлснээр бүгд найрамдах улс задрахаас өмнө цөөн тооны ахлах офицерыг нүүлгэн шилжүүлсэн байна. Талибанчууд нуран унасан засгийн газарт ажиллаж байсан хүмүүсийг мөшгөж, цаазалж эхлэхэд олон мянган хүн хөрш орнууд руу дүрвэсэн боловч одоогоор ихэнх командо цэргүүд Афганистанд нуугдаж байна.

Тус улсын тусгай хүчний офицер асан нэгэн эх сурвалж Афганистаны цэргүүдийг Украины дайнд элсүүлэх ажлыг Оросын “Wagner Group” зохион байгуулж байгаа гэж үзэж байгаагаа хэлжээ.

“Гадаадын цэргүүдийг [Оросын төлөө] элсүүлдэг цорын ганц байгууллага бол тэдний арми биш, харин ‘Wagner Group’ юм. Энэ нь таамаглал биш юм. Энэ бол мэдэгдэж байгаа баримт” гэж тэрээр хэлэв.

Тэрээр цааш нь “Тэд барууны холбоотнуудын төлөө Украины цэргүүдтэй мөр зэрэгцэн тулалдах сонирхолтой байгаа. Тэд Оросын төлөө тэмцэхийг хүсэхгүй байгаа. Орос бол дайсан. Гэхдээ тэд өөр юу хийж чадна гэж?”

Зарим мэдээллээр Орос улс Афганистанаас 10 мянга хүртэлх тооны тусгай цэрэг элсүүлэх төлөвлөгөөтэй байгаа аж.

Эх сурвалж: The Guardian