Хаитид гэмт бүлэглэлүүд хот руу дайран орж, 500 хоригдлыг шоронгоос суллажээ

Даваа гарагт гэмт бүлэглэлийн гишүүд Хаитигийн төв хэсэгт орших Миребалай хот руу дайран орж, 500 орчим хоригдлыг шоронгоос сулласан байна.

Хаитийн үндэсний цагдаагийн газрын хэвлэлийн төлөөлөгчийн хэлснээр нийслэл Порт-о-Пренсээс зүүн хойд зүгт 50 км зайд оршдог тус хотод нэмэлт хүч дайчилж, хотод хяналтаа сэргээсэн гэв.

Гэсэн ч оргосон хоригдлуудын олонх нь гудамжаар тэнүүчилсээр байгааг орон нутгийн мэдээллүүд анхааруулжээ.

Зэвсэгт бүлэглэлүүд Хаитигийн нийслэлийг бараг бүхэлд нь хяналтдаа байлгаж байгаа ч сүүлийн үед тус улсын бусад хотуудыг чиглэсэн халдлага нь нэмэгдсээр байна.

Миребалай нь Порт-о-Пренсээс хойшоо эрэг рүү, нөгөө нь зүүн тийш Доминикан руу чиглэдэг хоёр гол замын уулзвар дээр байрладаг.

Галт зэвсгээр зэвсэглэсэн этгээдүүд байшин барилга, хажуугаар өнгөрч буй хүмүүс рүү буудаж, байшин барилга, машинуудыг шатааж, хүмүүс хотоос дүрвэхэд хүрч байгааг нутгийн иргэд хэлсэн байна.

Тэд мөн орон нутгийн цагдаагийн газар руу дайрч, шорон руу дайран орж, дотор нь хоригдож байсан 500 орчим хоригдлыг суллажээ.

Орон нутгийн сэтгүүлчийн мэдээлснээр халдлага үйлдэгчид “Вив Ансам” бүлэглэлийн эвсэлд багтдаг, Порт-о-Пренсийн хойд хэсгийг хянаж буй “400 Мавзо” болон “Талибан” гэх бүлэглэлд харьяалагддаг байна. Тэднийг өөрсдийн хяналтад байдгаас бүс нутгаас хөдөө рүү чиглэсэн гол замуудыг хяналтдаа авахыг оролдож байж магадгүй гэж үзэж байна.

НҮБ-ийн тооцоолсноор өнгөрсөн жил Хаитид бүлэглэлийн хүчирхийллийн улмаас нийт 5,600 гаруй хүн амь үрэгдсэн бол 2024 онд 2,212 хүн гэмтэж бэртэж, 1,494 хүн барьцаалагдсан байна.

Эх сурвалж: BBC