Хэнтий, Сэлэнгэ аймагт гарсан хээрийн түймрийг бүрэн унтраав

Гэрэл зургийг MPA.mn

Өнгөрсөн хоногт ой хээрийн түймрийн дараах дуудлага мэдээлэл бүртгэгджээ. Тодруулбал,

Хэнтий аймгийн Дэлгэрхаан сумын Хэрлэн тооно багийн “Хаяа” гэдэг газар /аймгийн төвөөс баруун зүгт 150 км, сумын төвөөс зүүн урд зүгт 24 км/ хээрийн гал түймэр гарсан тухай дуудлагыг 04.01-ний өдрийн 13:11 цагт хүлээн авсан. Тус аймгийн Дэлгэрхаан сумын Засаг даргын Тамгын газрын ажилчид, орон нутгийн иргэд хээрийн гал түймрийг унтраах ажиллагааг зохион байгуулан ажиллаж 13:40 цагт цурамд оруулан, 15:30 цагт бүрэн унтраасан. Урьдчилсан байдлаар хээрийн гал түймэрт 8 га талбай өртөж шатсан.

Сэлэнгэ аймгийн Баянгол сумын 3 дугаар багийн “Урт хамар” гэдэг газар /аймгийн төвөөс урд зүгт 187 км, сумын төвөөс зүүн урд зүгт 20 км/ хээрийн гал түймэр гарч байна гэсэн дуудлагыг 04.01-ний өдрийн 13:18 цагт хүлээн авсан. Тус аймгийн Онцгой байдлын газрын Баянгол сум дахь 40 дүгээр ангийн алба хаагчид, сумын Засаг даргын Тамгын газрын ажилчид, орон нутгийн иргэд хээрийн гал түймрийг унтраах ажиллагааг зохион байгуулан ажиллаж 14:15 цагт цурамд оруулан, 15:27 цагт бүрэн унтраасан. Урьдчилсан байдлаар хээрийн гал түймэрт 21 га талбай өртөж шатсан байна. 

Дээрх түймэрт урьдчилсан байдлаар 29 га талбай өртөж шатсан.

Иймд иргэд та бүхэн галын аюулгүй байдлыг сайтар хангаж, хөдөө, орон нутагт зорчихдоо ил задгай гал түлэхгүй байх, асаасан шүдэнз, тамхины иш, үнс нурмыг бүрэн унтрааж, ой, хээрийн түймрийн галын аюулаас урьдчилан сэргийлэхийг ОБЕГ-аас анхааруулж байна.