Украинчуудын 50 гаруй хувь нь Трампын хүчин чармайлтад эргэлзэж байна

Украины иргэдийн 50 гаруй хувь нь АНУ-ын Ерөнхийлөгч Доналд Трампын энх тайвны төлөөх хүчин чармайлтад эргэлзэж байгаа бөгөөд дайныг Украины талд шударга бус дуусгах магадлалтай гэж эмээж байна.

Гурав дахь жилдээ үргэлжилж буй дайныг хурдан дуусгахаа Трамп амласан ч мөргөлдөөний талаар Кремлийн байр суурийг үе үе давтаж, нэг тохиолдолд Киевийг дайныг эхлүүлсэн гэж буруутгаж байсан. Мөн тэрээр Украинд үзүүлдэг байсан цэргийн тусламжаа хааж, тагнуулын мэдээлэл хуваалцахаа түр хугацаагаар зогсоосон.

Киевийн олон улсын социологийн хүрээлэн (KIIS)-ийн гуравдугаар сарын 12-22-ны хооронд явуулсан судалгаанд Украины нутаг дэвсгэрт амьдарч буй 1,326 хүн оролцжээ.

Судалгаанд оролцогчдын 32% нь Трампын оролцоотой байгуулах энх тайвны хэлэлцээрийг “Украины зарим шаардлагыг биелүүлэх ч ерөнхийдөө шударга бус байх болно” гэж үзэж байгаа бол 22% нь “бүрэн шударга бус байх болно” гэсэн хүлээлттэй байна.

Зөвхөн 3% нь Трампыг шударга энх тайвныг бий болгож чадна гэдэгт итгэж байгаагаа илэрхийлсэн бол 15% нь “зарим зүйл дээр Орост буулт хийсэн ч амар амгалан тогтоно” гэж найдаж байжээ.

Уг тоо баримтаас харахад Трампыг өнгөрсөн нэгдүгээр сард албан тушаалаа авснаас хойш украинчууд түүний хүчин чармайлтыг өөдрөгөөр хүлээж авах нь багассан байна.

Өнгөрсөн арванхоёрдугаар сард украинчуудын 20% нь энхийн гэрээг “нэлээд шударга бус” болно гэсэн хүлээлттэй байсан бол 11% нь “бүрэн шударга бус” үр дүнг хүлээж байжээ.

“KIIS”-ийн гүйцэтгэх захирал Антон Хрушецкий “2025 оноос өмнө ч гэсэн АНУ-ын зарим үйл ажиллагаанд украинчууд сэтгэл дундуур байсан бол Трампын засаг захиргаа АНУ-ын талаарх дургүйцлийг улам бататгаж байна” гэж тайлбарлав.

Түүнчлэн Украины иргэдийн 67% нь АНУ-ыг Украинаас залхаж, энхийн хэлэлцээрт буулт хийхийг шаардаж байна гэж үзэж байгаа нь судалгаагаар харагдсан байна.

Эх сурвалж: Reuters