Трампын албаны хүмүүс Украинд энх тайван тогтооход удаан хугацаа шаардагдахыг хүлээн зөвшөөрч эхэлжээ

Доналд Трампын засаг захиргааны өндөр албан тушаалтнууд Украины энхийн хэлэлцээрийг ойрын хугацаанд баталгаажуулж чадахгүй байж магадгүй гэж үзэж, Киев, Москва хоёрт шахалт үзүүлэх шинэ төлөвлөгөө боловсруулж эхэлснийг албаны хүмүүс мэдээлжээ.

Бүрэн эрхийн хугацааныхаа эхэн үед Трамп болон түүний ахлах зөвлөхүүд дөрөв, тавдугаар сар гэхэд бүрэн гал зогсоож, дараагийн саруудад энхийн гэрээ байгуулна гэж найдаж байв. Гэсэн ч албаны хүмүүс аль алийг нь ойрын хугацаанд биелэх боломжгүй гэж харж эхэлсэн байна.

АНУ-ын дээд албан тушаалтнууд хэдэн долоо хоногийн турш газрын ховор элемент болон энхийн хэлэлцээрийн асуудлаар Киевийг шүүмжилж ирсэн бол сүүлийн өдрүүдэд Москвагийн эсрэг бухимдал нь нэмэгдсэн болохыг эх сурвалжууд хэлжээ.

Мөн тэдний хэлснээр өнгөрсөн амралтын өдрүүдэд болсон хэд хэдэн уулзалтаар Цагаан ордон болон Төрийн департаментын албаныхан Оросын Ерөнхийлөгч Владимир Путин Вашингтоны энхийн хэлэлцээр байгуулах оролдлогыг идэвхтэй эсэргүүцэж байгааг хүлээн зөвшөөрч, эдийн засгийн болон дипломат хариу арга хэмжээгээр Орост шахалт үзүүлэх талаар ярилцсан байна.

Трампын засаг захиргаа Москвад ямар байдлаар шахалт үзүүлэх нь тодорхойгүй байгаа ч АНУ-ын өндөр албан тушаалтны хэлснээр Цагаан ордон тус улсад ногдуулах нэмэлт татвар, хориг арга хэмжээг үргэлжлүүлэн судалж байгаа гэв.

Ням гарагт Трамп телевизэд өгсөн ярилцлагадаа Путинийг шүүмжилж, түүнд “уурлаж” байгаагаа илэрхийлснээс гадна Оросын газрын тосыг худалдан авсан улс орнуудад 25-50 хувийн хоёрдогч татвар ногдуулах боломжтой талаар мэдэгдсэн.

Өнгөрсөн долоо хоногт АНУ-ын Төрийн нарийн бичгийн дарга Марко Рубио Балтын орнуудын Гадаад хэргийн сайд нартай уулзахдаа Украинд энх тайван тогтоох асуудал баталгаатай биш болохыг хэлээд, ямарваа нэгэн тохиролцоонд хүрэх боломж ойрхон харагдахгүй байгааг тэмдэглэсэн байна.

Үндэсний аюулгүй байдлын зөвлөлийн хэвлэлийн төлөөлөгч Жеймс Хьюитт Цагаан ордон хэлэлцээрийн асуудлаар “Оросын засгийн газарт бухимдалтай” байгааг мөн мэдэгджээ. “Хэрэв энэ мөргөлдөөнийг энхийн замаар шийдвэрлэх тал дээр нухацтай хандахгүй бол Ерөнхийлөгч Трамп Оросоос гарч буй бүх газрын тосны эсрэг хоёрдогч хориг арга хэмжээ авах талаар бодож үзнэ гэдгээ тодорхой хэлсэн.”

Оросын ГХЯ-ны дэд сайд Сергей Рябков мягмар гарагт өгсөн ярилцлагадаа дайныг эхлүүлэх болсон гол шалтгааныг авч хэлэлцээгүй цагт Москва дайныг зогсоох АНУ-ын саналыг хүлээн авах боломжгүй хэмээн мэдэгдсэн байна.

Эх сурвалж: Reuters