Оросын Батлан ​​хамгаалахын дэд сайд асан залилангийн хэргээр баривчлагджээ

Оросын Мөрдөн байцаах хороо Батлан ​​хамгаалахын дэд сайд асан Павел Поповын эсрэг залилангийн хэрэг үүсгэж, баривчилсан тухайгаа пүрэв гарагт мэдэгдэв. 

Поповыг 2021-2024 оны хооронд Патриот Паркийн гэрээт ажилчдыг Москва муж дахь өөрийн хувийн эзэмшил газартаа албадан, цалин хөлсгүй барилгын ажил хийлгэсэн гэж буруутгаж байгаа аж. Мөн цэцэрлэгт хүрээлэнд зориулсан барилгын материалыг өөрийн гэртээ ашигласан хэрэгт буруутгасан байна.

Москвагаас баруун тийш 63 км зайд орших Кубинка хотод байрладаг Патриот хүрээлэн нь зэвсэг, техник, буудлага хийх интерактив үзүүлэнгүүдийг агуулсан цэргийн сэдэвт цэцэрлэгт хүрээлэн, үзэсгэлэнгийн төв юм. Мөн Оросын зэвсэгт хүчинд зориулсан Ортодокс сүм хийд байдаг.

Томоохон гэмт хэргүүдийг хариуцдаг Мөрдөн байцаах хорооны мэдээлснээр Попов нь барилгын ажил дууссаны дараа ч Патриот Паркийн нөөцийг хувийн өмчөө засварлахад ашигласаар байсан байна.

Мөрдөн байцаагчид Поповыг цэцэрлэгт хүрээлэнгийн захирал Вячеслав Ахмедов, Батлан ​​хамгаалах яамны өндөр албан тушаалтан Владимир Шестеров нартай хамтран хуйвалдаан зохион байгуулсан гэж үзэж байгаа аж. Ахмедов, Шестеров хоёр энэ сарын эхээр ижил төрлийн хэргээр баривчлагдсан.

Эрх баригчдын мэдээлснээр Попов болон түүний гэр бүлийнхний нэр дээр Москва муж болон Оросын өмнөд хэсгийн Краснодар мужид 500 сая рубль буюу 5.4 сая ам.долларын үнэ бүхий үл хөдлөх хөрөнгө байдаг байна. 

Тэтгэвэрт гарсан генерал Попов нь 2013 оны арваннэгдүгээр сараас 2024 оны зургадугаар сарын хооронд Батлан ​​хамгаалах яамны дэд сайдын албыг хашиж байсан. Тэрээр Оросын армийн доторх авлигын эсрэг өргөн хүрээтэй тэмцлийн хүрээнд энэ онд авлигын хэргээр баривчлагдсан Батлан ​​хамгаалахын гурав дахь дэд сайд бөгөөд хэд хэдэн цэргийн өндөр албан тушаалтны нэг юм.

Баривчлах ажиллагаа өнгөрсөн дөрөвдүгээр сард Батлан ​​хамгаалахын сайд асан Сергей Шойгугийн холбоотон гэгдэж байсан дэд сайд асан Тимур Ивановыг саатуулснаар эхэлж байв. Тавдугаар сард Шойгуг сайдын албан тушаалаас нь огцруулж, Оросын Аюулгүйн Зөвлөлийн тэргүүнээр томилсон.

Эх сурвалж: The Moscow Times