Японд нисэх онгоцны буудлаас хайч алга болсны улмаас нислэгүүд цуцлагджээ

Бямба гарагийн өглөө Японы Хоккайдо арлын Нью Читосе нисэх онгоцны буудлын дэлгүүрээс хайч алга болсны улмаас 36 нислэг цуцлагдаж, 201 нислэг хойшлогджээ.

Дотоодын нислэгийн терминалын аюулгүй байдлын шалгалтыг хоёр цаг орчим зогсоож, олон зуун зорчигч нисэх онгоцны буудалд түр саатсан байна.

Нисэхийн захиргаа алга болсон хайчийг олохын тулд зорчигчдыг дахин аюулгүй байдлын шалгалтад оруулах үед асар их дараалал үүсжээ.

Бямба гарагт хайч олдоогүй ч аюулгүй байдлын шалгалт болон нислэгүүдийг сэргээсэн байна.

Даваа гарагт Шинэ Читосе нисэх онгоцны буудлын операторын мэдэгдсэнээр дэлгүүрийн ажилтан хайчийг дараагийн өдөр нь олсон бөгөөд алга болсон хайч мөн гэдгийг нь баталгаажуулсан аж. 

Японд жил бүр болдог Бон баярын дараа нислэгүүд цуцлагдаж, хойшлогдсон нь гэртээ харьж байсан олон хүний төлөвлөгөөнд нөлөөлсөн байна.

Газар, дэд бүтэц, тээвэр, аялал жуулчлалын яам Хоккайдогийн нисэх буудлуудад шалтгааныг судалж, дахин ийм зүйл болохоос урьдчилан сэргийлэхийг хүсжээ.

Хоккайдогийн нисэх онгоцны буудал “Энэ нь дэлгүүрийн хадгалалт, менежментийн систем хангалтгүй байснаас болсон гэдгийг бид хүлээн зөвшөөрч байна. Энэ нь бас онгоц барьцаалах эсвэл терроризмтой холбоотой байж болзошгүй тул дахин ийм төрлийн хэрэг гаргахгүйн тулд менежментээ боловсронгуй болгох болно” гэж мэдэгдсэн байна.

Олон нийтийн сүлжээний хэрэглэгчид нисэх онгоцны буудлын хариу арга хэмжээг сайшаасан бол зарим нь Японы агаарын тээврийн аюулгүй байдалд итгэх итгэлийг бэхжүүлсэн үйл явдал болсныг тэмдэглэжээ.

Нью Читосе бол Японы хамгийн их ачаалалтай нисэх онгоцны буудлуудын нэг бөгөөд зөвхөн 2022 онд тус нисэх буудлаар 15 сая гаруй зорчигч үйлчлүүлсэн байна.

Эх сурвалж: BBC