Австрали улс цагаачлалыг бууруулахын тулд гадаад оюутны визний хураамжийг хоёр дахин нэмэгдүүлжээ

Даваа гарагт Австрали улс олон улсын оюутнуудын визний хураамжийг хоёр дахин нэмэгдүүлж байгаагаа мэдэгдэв. Энэ нь орон сууцны зах зээлд дарамт болж байгаа цагаачлалыг бууруулах зорилготой алхам аж. 

Долдугаар сарын 1-ээс эхлэн олон улсын оюутны визний хураамж 710 австрали доллар байсан бол 1,600 австрали доллар (1,068 ам.доллар) болж өссөн бол зочлох визтэй хүмүүс болон төгсөлтийн түр визтэй оюутнуудыг Австралид байх хугацаандаа шинээр оюутны виз мэдүүлэхийг хориглосон байна.

“Өнөөдөр хүчин төгөлдөр болж буй өөрчлөлтүүд нь манай олон улсын боловсролын тогтолцоонд шударга байдлыг сэргээж, Австралийн хувьд илүү шударга, жижиг, илүү үр ашигтай цагаачлалын тогтолцоог бий болгоход тусална” гэж Дотоод хэргийн сайд Клэр О'Нил мэдэгдэв.

Гуравдугаар сард гаргасан албан ёсны мэдээллээр 2023 оны есдүгээр сарын 30-ны өдөр хүртэлх хугацаанд цагаачдын тоо 60%-иар нэмэгдэж, 548,800-д хүрч дээд амжилт тогтоосон байна.

Уг өөрчлөлтүүдийн дараа тус улсад оюутны виз мэдүүлэх нь АНУ (185 ам.доллар), Канад (110 ам.доллар) зэрэг өрсөлдөгч орнуудаас хамаагүй илүү үнэтэй болжээ.

Түүнчлэн 2022-23 онд үргэлжлүүлэн суралцах зорилгоор хоёрдогч виз авсан гадаад оюутны тоо 30 гаруй хувиар нэмэгдэж, 150,000-ыг давсан тул гадаадын оюутнуудад Австралид байх хугацаагаа сунгах боломжийг олгодог визний журмын цоорхойг хааж байгаагаа засгийн газар мэдэгдэв.

2022 онд Ковид-19-ийн хязгаарлалтыг цуцалснаас хойш шилжилт хөдөлгөөн рекорд түвшинд хүрсний дараа Австралийн эрх баригчид англи хэлний шалгалтын оноог чангатгах, оюутны виз авахад шаардагдах хадгаламжийн хэмжээг 24,505-29,710 австрали доллар болгон нэмэгдүүлэх зэргээр оюутны визний журмыг чангатгах олон арга хэмжээ аваад байгаа.

Гэвч засгийн газраас боловсролын салбарт үзүүлэх бодлогын дарамт шахалт нь тус улсын эдийн засаг болон олон улсын оюутны төлбөрөөс ихээхэн хамааралтай их дээд сургуулиудад сайнаар нөлөөлөхгүй гэж салбарынхан нь үзэж байна. 

Олон улсын боловсрол нь Австралийн хамгийн том экспортын салбаруудын нэг бөгөөд 2022-2023 оны санхүүгийн жилд эдийн засагт 36.4 тэрбум австрали долларын хөрөнгө оруулсан байна.

Эх сурвалж: Reuters