“Lenovo” компани тунгалаг дэлгэцтэй зөөврийн компьютероо танилцууллаа

Даваа гарагт Хятадын технологийн аварга “Lenovo” 17.3 инчийн тунгалаг дэлгэцтэй “ThinkBook Transparent Display” зөөврийн компьютероо олон нийтэд танилцууллаа.

Зөөврийн компьютерт суурилуулсан камер нь хиймэл оюун ухааны технологийг ашиглан дэлгэцийн ард байрлуулсан объектыг тодорхойлж, тухайн объектын талаар мэдээллийг танилцуулах чадвартай аж.

Мөн зөөврийн компьютер нь мэдрэгчтэй тракпад болон үзэгтэй тул зураг зурах зэрэг олон зориулалтаар ашиглах боломжтой байна.

“Lenovo”-ийн хэлснээр уг шинэ загварын компьютер нь дижитал артистууд болон архитекторуудын хэрэглээнд тохиромжтойгоос гадна “AR” дээрх дижитал контентыг бодит ертөнцөд буулгах төгс арга байж болох юм. 

Гэвч зөөврийн компьютер нь концепцийн бүтээгдэхүүн учраас “Lenovo” уг төхөөрөмжийг зах зээлд гаргах бодолгүй байгаа.

Хятадын технологийн аварга компани уг төхөөрөмжийг дэлхийн гар утасны салбарын хамгийн том үзэсгэлэн болох Барселона хотод болж буй “Mobile World Congress”-ын үеэр танилцуулжээ.

Өнгөрсөн жил “Lenovo” компани “MWC” үзэсгэлэнд эвхэгддэг дэлгэцтэй ухаалаг гар утас үзүүлж байв.

Эх сурвалж: CNBC