Путин хэсэгчилсэн дайчилгаа зарласны дараа Оросоос гарах нислэгийн тийз зарагдаж дуусжээ

Лхагва гарагт Ерөнхийлөгч Владимир Путин цэргийн нөөцөөс 300,000 цэргийн албан хаагчийг яаралтай дайчлах тушаал өгсний дараа Оросоос гарах нэг талын нислэгийн эрэлт нэмэгджээ.

Тус улсын Батлан ​​хамгаалахын сайд Сергей Шойгу зөвхөн мэргэжлийн цэргийн алба хаасан хүмүүсийг цэрэгт татна, оюутнууд болон хугацаат цэргийн алба хаасан хүмүүсийг цэрэгт татахгүй гэж тусдаа мэдэгдэл хийсэн.

Гэвч Путиний өглөө хийсэн мэдэгдлийн улмаас байлдааны насны зарим эрчүүдийг Оросоос гарахыг зөвшөөрөхгүй гэсэн болгоомжлол ард иргэдийн дунд нэмэгдсэн байна.

“Google Trends”-ийн мэдээллээс харвал тийз захиалгын хамгийн алдартай вебсайт болох “Aviasales”-ийн талаарх хайлт Орост огцом өссөн байна.

Мөн “Aviasales” дээрх Москвагаас Оросын иргэдийн визгүй зорчих боломжтой Туркийн Истанбул, Арменийн Ереван чиглэлийн шууд нислэгүүд лхагва гарагт зарагдаж дуусжээ.

Москвагаас Тбилиси хүртэл зорчих зарим дамжин нислэгүүд мөн дүүрсэн байсан бол Москвагаас Дубай чиглэлийн хамгийн хямд нислэгийн үнэ 300,000 рубль буюу 5,000 долларт хүрсэн нь сарын дундаж цалингаас тав дахин өндөр дүн аж.

Одоогоор Оросын 60.95 рубль нэг ам.доллартай тэнцэж байна.

Эх сурвалж: Reuters