УИХ-ын гишүүн Ж.Баясгалан: Иргэд халамжаас илүү хөдөлмөр эрхлэх тэгш боломж, хүртээмжтэй орчин хүсэж байна

Улсын Их Хурлын гишүүн Ж.Баясгалан өнөөдөр (2026.10.27) “Нээлттэй парламент” танхимд ажиллаж, 35 иргэнтэй уулзлаа. Тэрбээр Улсын Их Хуралд хөгжлийн бэрхшээлтэй иргэдийн эрх ашгийг хамгаалах, нийгмийн оролцоог нэмэгдүүлэх, төрийн бодлого, шийдвэр гаргах түвшинд тэдний дуу хоолойг хүргэхийн төлөө идэвхтэй ажилладаг гишүүдийн нэг юм.

Уулзалтад оролцсон иргэдийн ихэнх нь сонсголын, харааны болон тулгуур эрхтний бэрхшээлтэй байв. Тэд 2026 оны төсвийн тодотголыг хэлэлцэх үеэр хөгжлийн бэрхшээлтэй иргэдийн тэтгэвэр, асаргааны тэтгэмжийн хэмжээг амьжиргааны доод түвшнээс дээш байлгах зохицуулалтыг батлуулахад анхаарч ажилласанд Улсын Их Хурлын гишүүн Ж.Баясгаланд талархал илэрхийллээ.

Хөгжлийн бэрхшээлтэй иргэдийг халамжаас хамааралтай байлгахаас илүү хөдөлмөрлөх эрхийг нь хангаж, тогтвортой ажлын байраар дэмжих, нийгэм, эдийн засгийн оролцоог нь нэмэгдүүлэхэд чиглэсэн төрийн бодлого шаардлагатай байгааг онцолж байв.

Түүнчлэн, хөгжлийн бэрхшээлтэй иргэдийн орон сууцны хүртээмжийг нэмэгдүүлэх, зорилтот бүлэгт чиглэсэн ипотекийн болон түрээслээд өмчлөх орон сууцны тусгай нөхцөл, эрх зүйн зохицуулалт хангалтгүй байгааг уламжиллаа. Тухайлбал, түрээслээд өмчлөх орон сууцны хөтөлбөрт хамрагдах иргэн 45 ам.метр орон сууцны төлбөрт сар бүр 1.420.000 орчим сая төгрөг төлөхөөр байгаа нь олон иргэний орлогын түвшинтэй харьцуулахад өндөр байгааг хэлэв.

Мөн нийтийн эзэмшлийн зам, талбай, барилга байгууламж, нийтийн тээвэр, төрийн үйлчилгээний хүртээмжийг сайжруулах, боловсрол, эрүүл мэнд, сэргээн засах болон нийгмийн хамгааллын үйлчилгээний чанар, хүртээмжийг дээшлүүлэх асуудлыг хөндөн ярилцлаа. Түүнчлэн хөдөлмөрийн чадвар алдалтыг байнгын хугацаагаар тогтоолгосон иргэдийг давтан магадлан шинжилгээнд хамруулдаг тогтолцоо хүндрэл учруулж байгааг дурдаж, хүний эрхэд суурилсан, иргэдэд ээлтэй зохицуулалт бий болгохыг хүсэв.

Уулзалтын үеэр Улсын Их Хурлын гишүүн Ж.Баясгалан иргэдийн санал, хүсэлтийг сонсож, зарим асуудлаар мэдээлэл өгсний зэрэгцээ Саадгүй орчин, хүртээмжтэй үйлчилгээний тухай анхдагч хуулийн төслийн талаар танилцууллаа.

Тэрбээр уг хуулийн төслийг Улсын Их Хурлын гишүүн О.Саранчулуунтай хамтран боловсруулж, өргөн мэдүүлэхэд бэлэн болоод байгаа гэв. Хуулийн төсөлд орчны хүртээмж, мэдээллийн хүртээмж, үйлчилгээний хүртээмж, хандлагын хүртээмж гэсэн дөрвөн чиглэлийн зохицуулалтыг тусгасан байна.

Манай улсад харааны бэрхшээлтэй хүүхдүүдэд боловсрол олгодог ганцхан сургууль байдаг бөгөөд цахилгаан шатгүйгээс багш нар хүүхдүүдийг тэвэрч, өргөж давхар хооронд зорчуулдаг байдлыг жишээ болгон дурдаад, хүртээмжтэй орчин нь зөвхөн хөгжлийн бэрхшээлтэй иргэдийн асуудал биш болохыг онцоллоо.

Түүний хэлснээр хуулийн төсөл батлагдан хэрэгжсэнээр хөгжлийн бэрхшээлтэй иргэдээс гадна хүүхэд, ахмад настан, жирэмсэн эмэгтэйчүүд, хүүхдийн тэргээ түрж яваа эцэг, эхчүүд зэрэг бүх иргэн эрүүл, аюулгүй, хүртээмжтэй орчинд амьдрах нөхцөл сайжрах юм.

Улсын Их Хурлын гишүүн Ж.Баясгалан өнөөдрийн уулзалтаар иргэдийн гаргасан санал, хүсэлт, тулгамдсан асуудлыг нэг бүрчлэн судалж, холбогдох төрийн байгууллагуудад уламжлан шийдвэрлүүлэхэд анхаарч ажиллахаа илэрхийллээ.

Уулзалтад оролцсон иргэд Монгол Улсын нийт хүн амын 13 хувийг эзэлж буй хөгжлийн бэрхшээлтэй иргэдийн эрх, тэгш оролцоог хангахын төлөө тууштай ажиллаж ирсэнд Улсын Их Хурлын гишүүн Ж.Баясгаланд талархал илэрхийлээд, амьдралд хэрэгждэг, хүнээ дээдэлсэн, хүртээмжтэй эрх зүйн орчныг бүрдүүлж өгөхийг захилаа гэж Улсын Их Хурлын Нээлттэй парламентын газраас мэдээллээ.

Эх сурвалж: Парламент