ДЭЛХИЙН МЭДЭЭ

Винсент Ван Гогийн урьд өмнө үзэгдэж байгаагүй бүтээлийг олон нийтэд дэлгэжээ

Урьд өмнө үзэгдэж байгаагүй Винсент Ван Гогийн зургийг олж илрүүлсэн тухай түүний уран бүтээлийн музейн ажилтнууд баталжээ. Уг зургийг зураач карьерынхаа эхэн үед буюу 1882 онд зурсан болохыг Ван Гогийн музей пүрэв гарагт мэдээлжээ.

Энэхүү ядарсан өвгөний ноорог зураг Голландын нэгэн гэр бүлийн хувийн цуглуулгад зуу гаруй жилийн турш хадгалагдаж ирсэн бөгөөд пүрэв гарагт Амстердамын музейд анх удаа дэлгэгдэв. Зургийг олон нийт нэгдүгээр сарын хоёрон хүртэл дэлгээд, үүний дараа хувийн цуглуулгад буцааж өгөх юм.

Харандаагаар “Винсент” гэж жижгээр бичсэн уг зурган дээр хантааз, өмд, гутал өмссөн өндөр настай эр толгойгоо салаавчлан модон сандал дээр сууж буйг дүрсэлсэн байна. Энэ зургийг “Worn Out” гэсэн нэрээр музейд дэлгэжээ.

Нэрээ нууцлахыг хүссэн уг бүтээлийн эзэн зургийг Ван Гогийн бүтээл эсэхийг тогтоохыг музейгээс хүссэн байна. Алдарт зураачийн бүтээлийг шинээр илрүүлэх явдал маш ховор тохиолддог тул “(зургийн эзэн) музейд ирэхэд энэ нь бидэнд маш том гэнэтийн бэлэг болсон” гэж музейн ахлах судлаач Тейо Миенендорп хэлжээ.

Мөн уг бүтээлийг баталгаажуулахад харьцангуй хялбар байсан байна. 50 х 30 см хэмжээтэй уг бүтээлийг 1877 оны усан тэмдэгт бүхий цаасан дээр Ван Гогийн дуртай зургийн хэрэгсэл болох модон харандаа ашиглан, өвөрмөц хэв маягаар зурсан бөгөөд зураачийн алдартай бүтээл “Хөгшин хүн”-тэй төстэй байжээ.

Түүнчлэн 1882 оны арваннэгдүгээр сарын 24-нд зураачийн бичсэн хоёр захидлын тусламжтайгаар уг зургийг тухайн оны 11-р сарын сүүлийн долоо хоногуудад уг зурсан болохыг тогтоосон байна.

Зургаан сарын өмнө 100 гаруй жилийн турш хаалттай хаалганы цаана хадгалагдсан зураачийн өөр нэгэн бүтээл “Парисын гудамж” анх удаа олон нийтэд дэлгэгдсэн юм. Уг зураг 1887 онд зурагдсанаас хойш ихэнх хугацаанд Францын нэгэн гэр бүлийн эзэмшилд байжээ. Энэ зураг гуравдугаар сард дуудлага худалдаагаар 13,09 сая еврогоор худалдагдсан юм.

Эх сурвалж: BBC

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet