Трамп засгийн газрын дээд албан тушаалуудад өөртөө үнэнч байх, туршлагагүй хүмүүсийг сонгож байна

АНУ-ын Ерөнхийлөгчөөр сонгогдсон Доналд Трамп лхагва гарагт засгийн газрын хэд хэдэн гол албан тушаалд туршлага багатай хүмүүсийг сонгосон нь зарим холбоотныг нь гайхшируулж байна.

Трамп АНУ-ын ерөнхий прокурор, Америкийн хууль сахиулах байгууллагын тэргүүн албан тушаалд 42 настай конгрессын гишүүн Мэтт Гаетзыг сонгосон нь гэнэтийн сонголт байлаа. Гаетз нь өмгөөлөгчөөр ажиллаж байсан ч Хууль зүйн яаманд эсвэл прокуророор хэзээ ч ажиллаж байгаагүй бөгөөд бэлгийн мөлжлөгийн зорилгоор хүн худалдаалсан хэргээр Хууль зүйн яамнаас шалгагдаж байсан нэгэн юм.

Түүнчлэн Трамп Тулси Габбардыг үндэсний тагнуулын газрын даргаар томилов. Ардчилсан намын конгрессын гишүүн байсан, Трампын холбоотон болсон Габбард Ерөнхийлөгч асан Барак Обамагийн үед Сири дэх иргэний дайнд цэргийн хүчээр хөндлөнгөөс оролцсон явдлыг шүүмжилж, Оросын Ерөнхийлөгч Владимир Путинд Украин руу довтлох үндэслэл байсан гэж хэлж байжээ.

Габбард мөн тагнуулын ажлын шууд туршлага багатай бөгөөд тагнуулын 18 агентлагийг хянадаг энэ албан тушаалд томилогдоно гэж хэн ч таамаглаагүй юм.

Тэрээр 2004-2005 онд Хавайн үндэсний гвардийн хошуучаар Иракт үүрэг гүйцэтгэж байсан бөгөөд одоо АНУ-ын армийн нөөцөд дэд хурандаа цолтой.

Мягмар гарагт Трамп мөн Батлан ​​хамгаалахын сайдаар “Fox News” телевизийн тоймч, ахмад дайчин Пит Хэгсэтийг сонгосон. Хэгсет байлдааны ажиллагаанд эмэгтэйчүүдийг оролцуулахыг эсэргүүцэж, Америкийн топ генералыг арьсны өнгөнөөсөө болж тус албан тушаалд дэвшсэн хэмээн сэрдэж байв. Тэрээр мөн Трампыг 2017-2021 онд ерөнхийлөгч байх хугацаанд дайны гэмт хэрэг үйлдсэн цэргийн албан хаагчдыг өршөөхийг лоббидож байсан.

Трамп туршлагагүй хүмүүсээс гадна сенатч Марко Рубио зэрэг туршлагатай хүмүүсийг зарим томоохон албан тушаалд томилоод байгаа. Гэхдээ сонголтуудаас нь харвал тэрээр өөрийг нь эсэргүүцэх хамгийн бага магадлалтай, түүнд үнэнч байх хүмүүсээр өөрийгөө хүрээлүүлж байгаа нь тодорхой байна.

Донорууд, зөвлөхүүд, хандив цуглуулагчид зэрэг Трамптай ойр байдаг олон хүн Гаэтз, Хэгсэт зэрэг хүмүүсийн томилгоонд цочирдож буйгаа илэрхийлсээр байна.

Эх сурвалж: Reuters