Амьдрахуй...

Орфей театрын уран бүтээлчдийн шинэ уран бүтээл болох Хятадын нэрт зохиолч Үй Хуагийн “Амьдрахуй” туужаас сэдэвлэсэн драмын жүжиг аравдугаар сарын 1-нд Соёлын төв өргөөний тайзнаа нээлтээ хийсэн билээ. Нээлтээ хийгээд удаагүй ч үзэгч, шүүмжлэгчдийн анхаарлын төвд байгаа тус жүжгийн гол дүр Фу Гүйгийн дүрд МУГЖ Д.Баттөмөр тоглож буй.

Харин найруулагчаар М.Батболд, жүжгийн зохиолчоор “Тагтаа” хэвлэлийн газрын орчуулагч, яруу найрагч М.Батбаяр ажиллажээ. Тэрбээр зохиолч Үй Хуагийн “Амьдрахуй”, “Цусаа худалдсан тэмдэглэл”, “Вэн хот” зэрэг зохиолыг монгол хэлнээ яруу сайхнаар хөрвүүлэн уншигчдад хүргэсэн юм.

Орчин цагийн Хятадын нэрт зохиолчдын нэг Үй Хуа 1960 онд Ханжөү хотод эмчийн гэр бүлд төржээ. Дунд сургуулиа дүүргэсний хойно муждаа таван жил шүдний эмчээр ажиллаж байгаад, Бээжин хотын Лү Шюнь утга зохиолын сургуульд элссэн аж. Уран бүтээлийнхээ гарааг 1983 оноос эхэлсэн бөгөөд “Амьдрахуй” туужаа 1992 онд хэвлүүлжээ. Энэ алдартай романаар хятадын алдарт найруулагч Жан Имоу ижил нэрт кино бүтээсэн нь мөн нэлээдгүй шуугиан тарьж, Каннын кино наадмаас шагнал хүртэж байсан удаатай.

"Амьдрахуй" жүжиг Соёлын төв өргөөний тайзнаа, өдөр бүр 19:00 цагаас үзэгчдийн хүртээл болж байна.