Калифорнийн захирагч бүх төрлийн нийлэг уут хэрэглэхийг хориглох тухай хуульд гарын үсэг зуржээ

АНУ-ын Калифорни мужийн амбан захирагч Гэвин Ньюсом бүх төрлийн нийлэг уутыг хориглосон хуульд гарын үсэг зуржээ.

Тус мужийн супермаркет болон бусад дэлгүүрүүдэд нимгэн нийлэг уут хэрэглэхийг аль хэдийн хориглосон байсан ч худалдан авагчид дахин ашиглах боломжтой, дахин боловсруулах боломжтой зузаан нийлэг материалтай уут худалдаж авах боломжтой байв.

Тэгвэл өнгөрсөн сард муж улсын хууль тогтоогчдын дэмжиж, өчигдөр мужийн захирагчийн гарын үсэг зурж баталгаажуулсан хуулийн дагуу 2026 оноос эхлэн тус мужид бүх төрлийн нийлэг уут хэрэглэх нь хориотой болж байгаа аж.

Дэлгүүрийн кассан дээр хэрэглэгчдэд зөвхөн цаасан уут санал болгоно гэсэн үг юм.

Хуулийн төслийг дэмжигчдийн нэг, мужийн сенатор Кэтрин Блэйкспирын хэлснээр арваад жилийн өмнө батлагдсан нийлэг уутны хориг нь хуванцрын хэрэглээ буурахад нөлөөлөөгүй байна.

Мөн өмнөх хуулийн дагуу дахин ашиглагдах, дахин боловсруулагдах боломжтой зузаан нийлэг уутны хэрэглээг зөвшөөрсөн ч хүмүүс нийлэг уутыг дахин ашигладаггүй, дахин боловсруулдаггүй болохыг Блэйкспир тэмдэглэв. Судалгаагаар нэг хүнд ногдох нийлэг уутны хэмжээ 2004 онд жилд 3.6 кг байсан бол 2021 онд 5 кг болж өссөн байна.

“Oceana” гэх байгаль орчны төлөөх ашгийн бус байгууллага уг хуулийн төслийг сайшаагаад, Калифорни мужийг хуванцар хаягдлын эсрэг дэлхий нийтийн хүчин чармайлтад тэргүүлэгч болж байгааг тэмдэглэжээ.

АНУ-ын Байгаль орчны судалгаа, бодлогын төвөөс гаргасан судалгаагаар Калифорнийг оролцуулаад 12 муж улс нийлэг уутны хэрэглээнд зарим төрлийн хориг тавьсан байдаг байна. Мөн 28 муж даяар олон зуун хот гялгар уутыг хориглосон байдаг аж.

Калифорнийн нийтийн ашиг сонирхлын судалгааны группийн захирал Женн Энгстром “Нийлэг уут нь бидний хүрээлэн буй орчныг бохирдуулдаг төдийгүй бичил хуванцар нь бидний ундны усыг бохирдуулж, эрүүл мэндэд заналхийлж байна. Калифорничууд арваад жилийн өмнө муж улс даяар хүнсний нийлэг уутыг хориглох саналыг дэмжсэн ч хуульд дахин өөрчлөлт оруулах шаардлагатай байсан” гэж мэдэгдсэн байна.

2007 онд Сан Франциско хотын захирагчаар ажиллаж байхдаа Ньюсом тус улс даяар анх удаа нийлэг уутыг хориглох тогтоолд гарын үсэг зурж байжээ.

Эх сурвалж: CNN