Израил халдварт саагийн эсрэг вакцинжуулалтад зориулж “хүмүүнлэгийн түр зогсолт” хийхийг зөвшөөрчээ

Израил 640,000 орчим хүүхдийг халдварт саа өвчний эсрэг вакцинжуулалтад хамруулах зорилгоор Газын зурваст “хүмүүнлэгийн түр зогсолт” хийхийг зөвшөөрсөн болохыг Дэлхийн Эрүүл Мэндийн Байгууллага (ДЭМБ) мэдэгдэв.

ДЭМБ-ын ахлах ажилтан Рик Пиперкорны мэдэгдсэнээр вакцинжуулалт ням гарагт эхлэх бөгөөд зурвасын төв, өмнөд, хойд хэсэгт гурван тусдаа үе шаттайгаар хийгдэнэ. Үе шат бүр гурван өдөр үргэлжлэх ба эдгээр өдрүүдэд тулааныг орон нутгийн цагаар 06:00-15:00 цагийн хооронд зогсооно.

НҮБ-ын албаныхан Газын бүсэд сүүлийн 25 жилийн хугацаанд анх удаа халдварт саа өвчний тохиолдол бүртгэгдсэн болохыг саяхан мэдэгдсэн юм. 10 сартай хүүхэд хэсэгчлэн саажилттай болсон гэж мэдэгдсэнээс хойш хэд хоногийн дараа энэхүү хэлэлцээрийг хийсэн юм. 

“nOPV2” вакцины 1.26 сая орчим тун Газын зурваст аль хэдийн хүргэгдсэн бөгөөд 400,000 нэмэлт тун удахгүй хүргэгдэх юм байна.

Вакцинжуулалтын кампанит ажлыг Палестины Эрүүл мэндийн яам, ДЭМБ, ЮНИСЕФ, Ойрх Дорнод дахь Палестины дүрвэгсдэд тусламж үзүүлэх агентлаг (UNRWA) хамтран зохион байгуулах ба 2000 гаруй эрүүл мэнд, нийгмийн ажилтан вакцинжуулалтын сургалтад хамрагджээ. 

ДЭМБ Газын зурваст вирусийн тархалтыг зогсоохын тулд нийт хүүхдүүдийн 90%-ийг вакцинжуулахаар хүргэхээр төлөвлөсөн байна. Шаардлагатай бол вакцинжуулалтыг энэ түвшинд хүргэхийн тулд хүмүүнлэгийн түр зогсолтыг дөрвөн өдөр болгон сунгахаар талууд тохиролцсон аж. 

Халдварт саа нь голдуу таваас доош насны хүүхдэд халдварладаг, вирусээр үүсгэгддэг өвчин юм. Халдварлах чадвар нь өндөр бөгөөд ихэвчлэн муу ус, бохирлогдсон усаар дамжин халдварладаг.

ДЭМБ-ын мэдээлснээр Газын зурвас болон эзлэгдсэн Баруун эрэг дэх дархлаажуулалтын түвшин мөргөлдөөнөөс өмнө оновчтой байсан ба саагийн эсрэг вакцины хамрагдалт 2022 онд 99 хувьтай байжээ. Харин өнгөрсөн онд 89 хувь болж буурсан байна.

Эх сурвалж: BBC