Чех улс Оросын битүүмжилсэн хөрөнгөөс олсон орлогыг Украинд сум худалдаж авахад зарцуулна

Чех улс Европын Холбооны нутаг дэвсгэрт битүүмжилсэн Оросын хөрөнгөөс авах хүүгийн тодорхой хэсгийг Украинд зориулж их бууны сум худалдаж авахад зарцуулахаар болсныг тус улсын Батлан ​​хамгаалах яам мягмар гарагт мэдэгдэв.

2022 оны хоёрдугаар сард Орос Украин руу түрэмгийлсний дараа барууны орнууд Оросын 300 орчим тэрбум долларын хөрөнгийг царцаасан.

ЕХ-ны орнууд Оросын төв банкны худалдаж авсан бонд болон бусад үнэт цаас зэрэг хөрөнгийн хүүг Украинд туслах зорилготой санд байршуулж байгаа.

ЕХ-ны засгийн газрууд зургадугаар сард уг хөрөнгөөс олсон ашгийн 1.4 тэрбум евро буюу 1.5 тэрбум ам.долларыг Украинд зэвсэг худалдан авах болон бусад төрлийн тусламж үзүүлэхэд зарцуулахаар тохиролцсон юм.

Тэгвэл Чехийн Батлан ​​хамгаалах яам энэ мөнгөний тодорхой хэсгийг Украинд их бууны сум худалдаж авахад зарцуулахаар болсныг мэдэгдэв.

“Оросын царцаасан хөрөнгөөс олох орлогыг ашиглах Европын холбооны шийдвэрийн ачаар бид хэдэн зуун мянган калибрын сумыг Украинд нийлүүлэх боломжтой болж байна” гэж сайд Жана Черночова өнөөдөр мэдэгджээ.

Яамнаас дэлгэрэнгүй мэдээлэл өгөөгүй ч нийлүүлэлтийг ойрын саруудад хийж эхлэх бөгөөд ингэснээр удахгүй тулааны талбарт мэдэгдэхүйц нөлөө үзүүлэх болно гэж мэдэгдэв.

Өнгөрсөн долдугаар сард Кремль Оросын царцаасан хөрөнгөөс олсон хүүг Украинд үзүүлэх цэргийн тусламжийг санхүүжүүлэхэд ашиглах төлөвлөгөөг “хулгай” гэж нэрлээд, шийдвэртэй холбоотой бүх хүний эсрэг хуулийн дагуу арга хэмжээ авахаа анхааруулж байв.

Украин энэ санаачилгын хүрээнд эхний ээлжийн 50,000-100,000 ширхэг сумыг зургадугаар сард хүлээн авсан бөгөөд нийлүүлэлт сар бүр хийгдэж байгааг Чехийн албаны хүмүүс мэдэгджээ.

Оросын хөрөнгөөс олсон ашгаас гадна Чех улс тавдугаар сар гэхэд барууны холбоотнуудаасаа 1.7 тэрбум евро цуглуулсан ба үүгээр хагас сая сум худалдаж авах боломжтой байна.

Эх сурвалж: Reuters