Агаарын хэм нэмэгдэхийн хэрээр Өмнөд Солонгосын фермерүүд дулаан оронд ургадаг гадил жимсийг туршилтаар тариалах болжээ

Өмнөд Солонгосын тариаланчид цаг уурын өөрчлөлтийг өөрт ашигтайгаар ашиглаж дулаан (субтропик) бүсэд ургадаг гадил жимс тариалж эхэлжээ.

Өвлийн хүйтэн цаг агаараас ургацаа хамгаалахын тулд тодорхой хугацаанд хүлэмж ашиглах шаардлагатай хэвээр байгаа ч дулаан уур амьсгалд илүү тохиромжтой жимсийг туршилтаар тариалах тариаланчдын тоо нэмэгдсээр байгаа аж.

Хөдөө аж ахуй, газар тариаланг хариуцдаг Хөдөөгийн хөгжлийн захиргааны мэдээллээр тус улсад дулаан орны жимс ургамал тариалдаг талбай 2021 онд 295 га байснаас 2023 онд 3306 га болж нэмэгджээ. Үүнээс 67 ферм нь гадил жимс тариалдаг байна.

Өмнөд Солонгос нь сэрүүн бүсэд оршдог, дөрвөн улиралтай хэдий ч уур амьсгалын өөрчлөлтийн улмаас жилийн туршид илүү дулаан, чийглэг болж байгаа.

Солонгосын цаг уурын албаны тайланд өгүүлснээр тус улсын жилийн дундаж температур 2012 оноос хойш тасралтгүй нэмэгдсээр байгаа бөгөөд өнгөрсөн жил 13.7 хэмд хүрчээ. Энэ нь 1973 онд бүртгэл хөтөлж эхэлснээс хойших хамгийн өндөр температур аж.

Мөн өнгөрсөн жилийн борооны улиралд улсын хэмжээнд 660.2 мм хур тунадас орсон нь жилийн дундаж 356.7 мм-ээс бараг хоёр дахин өндөр үзүүлэлт юм.

Өмнөд Солонгосын цаг уурын нөхцөл дулаан бүс нутагтай төстэй болж байгаа тул тохиромжтой тариалангийн сортуудыг олох нь нэн чухал болохыг Сөүлийн их сургуулийн Хөдөө аж ахуйн шинжлэх ухааны профессор Ким Кванг Сү онцлов.

Тус улсад халуун болон дулаан орны жимс ихэвчлэн өндөр үнэтэй худалдаалагддаг тул хэрэглэгчдийн хувьд энэ нь мөн хямд үнэтэй, дотоодын бүтээгдэхүүн авах боломжийг олгох давуу талтай.

Эх сурвалж: Reuters