Нетаньяху зэвсэгт хүчний зарласан тактикийн түр зогсолтыг буруушаав

Израилын зэвсэгт хүчин Палестины анклав руу хүмүүнлэгийн тусламж нэвтрүүлэхийн тулд Газын зурвас руу орох нэг замын дагуу өдөр бүр тактикийн түр зогсолт хийнэ гэдгээ ням гарагт зарлажээ.

Энэ хүрээнд, Керем Шаломын гармаас Салах ал-Дины зам хүртэл, цаашлаад хойд зүгт үүрийн 5 цагаас өдрийн 16 цагийн хооронд өдөр бүр түр зогсолт хийх гэнэ.

Гэвч Израилын Ерөнхий сайд Биньямин Нетаньяху уг төлөвлөгөөг шүүмжилсэн байна.

“Ерөнхий сайд хүмүүнлэгийн тусламжид зориулж 11 цаг завсарлах тухай мэдээг сонсоод цэргийн сайдадаа хандаж, үүнийг хүлээн зөвшөөрөхгүй гэдгээ ойлгуулсан” гэж Израилын албаны хүн хэлэв.

Мөн Нетаньяхугийн эрх баригч эвслийн үндсэрхэг шашны намуудын нэгийг тэргүүлдэг Үндэсний аюулгүй байдлын сайд Итамар Бен-Гвир тактикийн түр зогсолтыг буруушааж, ийм шийдвэр гаргасан хүнийг ажлаас нь халах ёстой гэж мэдэгджээ.

Зэвсэгт хүчний зүгээс Газын зурвасын өмнөд хэсгийн гол анхаарлаа хандуулж буй Рафах хотод ажиллагаагаа үргэлжлүүлнэ гэдгээ тодруулсан байна.

Нетаньяхугийн хариу үйлдэл нь Израилын эвслийн засгийн газрын гишүүд болон цэргийнхэн Газын асуудлаар хуваагдмал байгааг дахин харуулсан явдал боллоо.

Долоо хоногийн өмнө Төвийн үзэлтэй генерал Бенни Ганц Нетаньяхуг буруутгаад, албан тушаалаасаа огцорч буйгаа зарласан юм.

Мөн өнгөрсөн долоо хоногт хэт үнэн алдартны шашны еврейчүүдийг цэрэгт татах тухай хуулийн төслийн санал хураалтын үеэр Батлан ​​хамгаалахын сайд Ёав Галлант намын тушаалыг үл тоон эсрэг санал өгч, санал зөрөлдөөнийг ил болгосон.

Эвсэл дэх шашны намууд хэт үнэн алдартны шашинтнуудыг цэрэгт татахыг эрс эсэргүүцсэн нь олон израилчуудын уур хилэнг төрүүлж, дайн үргэлжлэх тусам энэ байдал улам бүр нэмэгдсээр байна.

Эх сурвалж: Reuters