Путин Батлан хамгаалахын сайдад Шойгугийн оронд эдийн засгаар мэргэшсэн Андрей Белоусовыг санал болгожээ

Ням гарагт Оросын Ерөнхийлөгч Владимир Путин батлан хамгаалахын сайдаар 68 настай Сергей Шойгугийн оронд эдийн засгийн чиглэлээр мэргэшсэн 65 настай дэд сайд асан Андрей Белоусовыг санал болгожээ.

Кремлийн мэдэгдэлд дурдсанаар Путин 2012 оноос хойш батлан хамгаалах салбарыг хариуцаж буй эртний холбоотон болох Шойгуг Николай Патрушевын оронд Аюулгүйн Зөвлөлийн нарийн бичгийн дарга болгож, цэрэг-аж үйлдвэрийн цогцолборыг хариуцуулахыг санал болгосон байна. Патрушевыг өөр албан тушаалд томилох аж.

Энэ нь 2022 оны хоёрдугаар сард Орос Украин руу түрэмгийлснээс хойш Путиний цэргийн командлалд оруулж буй хамгийн том өөрчлөлт юм.

Кремлийн хэвлэлийн төлөөлөгч Дмитрий Песков хэлэхдээ Орос улс 1980-аад оны дундуур цэрэг, хууль сахиулах байгууллага дотоодын нийт бүтээгдэхүүний 7.4 хувийг бүрдүүлдэг байсан Зөвлөлт Холбоот Улстай ижил нөхцөл байдалд ойртож байгаа учраас энэ өөрчлөлтийг утга учиртай гэж тодорхойлжээ.

Энэ хэмжээний зардлыг улс орны нийт эдийн засагтай сайтар уялдуулах нь чухал учраас Путин Батлан хамгаалахын сайдаар эдийн засагч хүнийг томилох хүсэлтэй байгаа гэж Песков хэлсэн байна.

“Хэн инновацад илүү нээлттэй байна, тэр тулааны талбарт ялалт байгуулна” гэж хэлжээ.

Гэхдээ Шойгугийн холбоотон, Батлан хамгаалахын дэд сайд Тимур Иванов 11 сая ам.долларын авлигын хэрэгтэй холбогдсоны дараа Путин уг өөрчлөлтөөр батлан хамгаалахын зардалд хяналт тавихаар оролдож байна гэж ажиглагчид үзэж байна.

Өнгөрсөн долоо хоногт тангаргаа өргөсөн Путин Гадаад хэргийн сайд Сергей Лавровыг албан тушаалд нь үлдээхээр төлөвлөжээ.

Мөн Холбооны аюулгүй байдлын алба (ФСБ) болон Гадаад тагнуулын албаны (SVR) дарга Александр Бортников, Сергей Нарышкин нарыг албан тушаалд нь үлдээхээр болсон байна.

Эх сурвалж: Reuters