Хэрэв НАТО Украин руу цэргээ илгээвэл "асар их аюул дагуулна" гэж Орос анхаарууллаа

НАТО-ийн цэргийг Украин руу илгээх нь туйлын аюултай байж болзошгүй гээд, барууны хөндлөнгийн оролцоог дэмжсэн Украины өргөдлийг анхааралтай ажиглаж байгаагаа Орос улс лхагва гарагт мэдэгдэв.

Мягмар гарагт Украины ерөнхийлөгчийн цахим хуудсанд “Украин улс АНУ, Их Британи болон бусад орнуудаас цэргээ илгээхийг хүсэх ёстой” гэсэн агуулга бүхий өргөдөл тавигдсан байна.

Кремлийн хэвлэлийн төлөөлөгч Дмитрий Песковоос энэ талаар асуухад “Киевийн дэглэмийг урьдчилан таамаглах аргагүй” гэж хариулжээ.

Цааш нь “Энэ мөргөлдөөнд НАТО-ийн орнууд шууд хөндлөнгөөс оролцох нь асар их аюул дагуулж болзошгүй гэж бид олон удаа хэлж байсан тул бид үүнийг туйлын өдөөн хатгасан үйлдэл гэж үзэж байгаа бөгөөд мэдээжийн хэрэг бид үүнийг маш анхааралтай ажиглаж байгаа” гэж хэлсэн байна.

Өргөдөл 25 мянган санал цуглуулсны дараа Ерөнхийлөгч Володимир Зеленьский хүсэлтэд хариу өгөх ёстой. Одоогийн байдлаар 1,694 санал цуглуулсан байна.

НАТО зэвсэг нийлүүлэх байдлаар Украиныг дэмжиж ирсэн ч дайнд шууд хөндлөнгөөс оролцохоос татгалзаж ирсэн. Ийм хөндлөнгийн оролцоо нь хүн төрөлхтнийг Дэлхийн III дайн руу түлхэж болзошгүй гэж АНУ-ын Ерөнхийлөгч Жо Байден, Оросын Ерөнхийлөгч Владимир Путин нар анхааруулдаг.

Гэвч Францын Ерөнхийлөгч Эммануэль Макрон хэрэв Орос Украинд зөрчиж болохгүй шугамыг зөрчиж, Киев хүсэлт гаргавал барууны цэргийг Украин руу илгээх асуудал “хууль ёсны дагуу” гарч ирнэ гэж саяхан мэдэгдсэн.

Үүний хариуд, Оросын Гадаад хэргийн яамны хэвлэлийн төлөөлөгч Мария Захарова Францын цэргийг Украин руу илгээвэл Оросын бай болно гэдгийг анхааруулжээ.

Эх сурвалж: Reuters