Туркийн парламентын комисс Шведийн саналыг дэмжсэнээр НАТО-ийн гишүүн болоход нэг алхмаар ойртлоо

Мягмар гарагт Туркийн парламентын гадаад харилцааны комисс Шведийн НАТО-д элсэх хүсэлтийг дэмжлээ.

Ерөнхийлөгч Тайип Эрдоганы эрх баригч АК намын хяналтад байдаг тус комисс өнгөрсөн жил гаргасан Шведийн саналыг дэмжсэн байна. Арваннэгдүгээр сарын 16-нд болсон өмнөх хэлэлцүүлгээр санал хураалтыг хойшлуулаад байсан юм.

Дараагийн алхам бол Эрдоганы нам олонх болсон парламентын ерөнхий ассамблейн санал хураалт юм. Санал хураалтыг долоо хоногийн дотор явуулж, саналыг батлах төлөвтэй байна. Үүний дараа Эрдоган гарын үсэг зурснаар уг үйл явц дуусна.

Шведийн Гадаад хэргийн сайд Тобиас Биллстром комиссын санал хураалтын дараа Швед улс энэхүү алхмыг сайшааж байгааг хэлээд, НАТО-д элсэхийг тэсэн ядан хүлээж байгаагаа илэрхийлжээ.

Цэргийн эвсэл мөн Туркийн алхмыг сайшаасан байна. НАТО-ийн Ерөнхий нарийн бичгийн даргын Улс төрийн хэрэг, аюулгүй байдлын бодлого хариуцсан туслах Борис Руге “X” платформ дээр комиссын зөвшөөрлийг "сайн мэдээ" гэж онцолжээ.

Эрдоган өнгөрсөн оны тавдугаар сард Швед, Финландын аль алиных нь тус холбоонд элсэх хүсэлтийг террористуудыг улс орондоо орогнуулахыг зөвшөөрдөг гэсэн шалтгаанаар, мөн батлан ​​хамгаалах худалдаанд тавьсан хоригтой нь холбогдуулан эсэргүүцсэн юм.

Энэ оны дөрөвдүгээр сард Турк Финландын саналыг соёрхон баталсан ч Швед улсыг Европын холбоо болон АНУ-д террорист бүлэглэл гэж үздэг Курдистаны ажилчны нам (ПКК)-ын орон нутгийн гишүүдийг дарах арга хэмжээг авахыг шаардсан хэвээр байв.

Үүний хариуд Стокгольм террорист байгууллагын гишүүн болохыг хууль бус гэж үзэх терроризмын эсрэг шинэ хуулийн төслийг өргөн барьсан.

Түүнчлэн Швед, НАТО-ийн гишүүн Финланд, Канад, Нидерланд улс Туркийн зэвсгийн экспортын бодлогыг зөөлрүүлэх алхам хийсэн.

НАТО-ийн гишүүн Унгар улс мөн Шведийн гишүүнчлэлийг батлаагүй байгаа ч Турийг Скандинавын улсыг цэргийн эвсэлд оруулж, Балтын тэнгис дэх хамгаалалтыг бэхжүүлэхэд гол саад гэж НАТО-ийн холбоотнууд харж байв.

Эх сурвалж: Reuters