Францын парламент Макроны вакцины гэрчилгээний төлөвлөгөөг баталлаа

Пүрэв гарагт Францын парламент Ерөнхийлөгч Эммануэль Макроны “Омикрон” хувилбарын тархалтыг зогсооход туслах вакцины гэрчилгээ нэвтрүүлэх төлөвлөгөөг баталлаа.

Макрон энэ долоо хоногийн эхээр “Le Parisien” сонинд хэлэхдээ Ковид-19-ийн вакцинаас татгалзсан хүмүүсийг олон нийтийн газраас шахах зэрэг аргаар амьдралыг нь төвөгтэй болгохыг хүсэж байгаа бөгөөд эцэст нь тэд вакцин хийлгэх болно гэж мэдэгдсэн.

Ерөнхийлөгчийн сонгууль болохоос гуравхан сарын өмнө хэлсэн Макроны бүдүүлэг үг хэллэгийг олон нийт улс төрийн нарийн тооцоолсон үйлдэл гэж үзсэн бол вакцин хийлгээгүй хүмүүсийн дунд бухимдлыг улам хурцатгасан.

Засгийн газрын мэдээллээр 12-оос дээш насны хүмүүсийн 90 гаруй хувь нь дор хаяж хоёр тунд хамрагджээ. Эрүүл мэндийн сайд Оливье Вераны хэлснээр Макроны ярилцлагыг нийтэлсний дараа лхагва гарагт вакцин хийлгэсэн хүмүүсийн тоо аравдугаар сарын нэгнээс хойш дээд амжилт тогтоосон гэж мэдэгдэв.

Доод танхимын хууль тогтоогчид шөнөжин хуралдсаны дараа өглөөний 05:00 цагийн орчимд вакцины гэрчилгээний тухай хуулийн төслийг 214-өөс 93-ын саналаар баталлаа. ​​Хуулийн төслийн эсрэг санал өгсөн хүмүүсийн олонх нь барууны болон зүүний үзэлтнүүд байжээ. Хууль тогтоомжийг Сенат руу, дараа нь Үндэсний ассамблей руу илгээж эцсийн санал хураалт явуулах юм.

Францын иргэд хэдэн сарын турш кино театр, кафе гэх мэт газруудад нэвтэрч, галт тэргээр зорчихын тулд вакцин хийлгэсэн нотлох баримт эсвэл сөрөг Ковид-19-ийн шинжилгээгээ шалгуулах шаардлагатай байв. Гэвч “Делта” болон “Омикрон” хувилбаруудын тархалт нэмэгдэж байгаа тул засгийн газар шинэ хуулийн төсөлд шинжилгээний хувилбараас татгалзахаар шийджээ. Вакцины гэрчилгээний журам нь 16-аас дээш насныханд хамаарах юм.

Ерөнхий сайд Жан Кастекс хэлэхдээ Итали, Австри зэрэг албадан вакцинжуулалтад шилжсэн орнууд Францаас бага вакцинжуулалтын түвшинтэй байна. Мөн цаг нь ирэхэд Франц дөрөв дэх тунг хийхэд бэлэн байна гэж мэдэгдэв.

Лхагва гарагт Франц улсад сүүлийн 24 цагийн дотор 332,000 гаруй шинэ тохиолдол бүртгэгдэж, тус улсын хэмжээнд 246 хүн эмнэлгүүдэд нас баржээ.

Эх сурвалж: Reuters