Орос нэг шөнийн дотор Украин руу 16 “камиказе” нисгэгчгүй онгоц илгээжээ

Москва Украины чухал дэд бүтэц рүү олон арван пуужин харваснаас нэг өдрийн дараа Украин руу нэг шөнийн дотор 16 “камиказе” нисгэгчгүй онгоцоор халджээ.

Украины Агаарын довтолгооноос хамгаалах хүчин зүүн өмнөд болон хойд зүгээс илгээсэн 16 нисгэгчгүй онгоцыг бүгдийг нь устгасан байна.

Киев хотын дарга Виталий Кличко өөрийн “Telegram” сувгаар нийслэл рүү чиглэсэн долоон нисгэгчгүй онгоцны тавыг нь хот дотор, хоёрыг нь Киевт хүрэхээс өмнө устгасан гэж мэдэгджээ.

Киевийн цэргийн захиргааны дарга Сергей Попкогийн хэлснээр нэг нисгэгчгүй онгоц унахдаа Холосиев дахь захиргааны байрыг мөргөсөн байна.

Түүнчлэн Украины Зэвсэгт хүчний жанжин штабын баасан гарагийн өглөөний мэдээллээр Орос сүүлийн 24 цагийн дотор 85 удаа пуужин, 35 удаа агаараас цохилт өгч, олон пуужин харвах системээр 63 удаа цохилт өгсөн байна.

Орос аравдугаар сарын дунд үеэс эхлэн Украины эсрэг олон тооны нисгэгчгүй онгоц илгээж, пуужингийн цохилт өгч, эрчим хүчний дэд бүтцэд нь ихээхэн хохирол учруулснаар тус улс даяар цахилгааны тасалдал үүсээд байгаа билээ.

Эх сурвалж: Reuters