Оросын хүчинд эзлэгдсэн Украины Херсон муж шинэ засгийн газартай болжээ

Украины Херсон мужид шинэ засгийн газар байгуулагдсан тухай бүс нутгийн цэрэг-иргэний захиргаа даваа гарагт “Telegram”-аар мэдэгджээ.

“Херсон мужийн цэрэг-иргэний захиргааны тэргүүн Владимир Сальдо Оросын бүс нутгийн төрийн байгууллагуудын туршлагыг судалж, Херсон мужид шинэ засгийн газар байгуулах шийдвэр гаргасан ба Херсон мужийн хамгийн шилдэг оршин суугчдаас төдийгүй Оросын мэргэжилтнүүд болон менежерүүдээс сонгож засгийн газраа бүрдүүлсэн” гэж мэдэгдэлд дурджээ.

Өмнө нь Оросын Калининград мужийн Ерөнхий сайдын нэгдүгээр орлогчоор ажиллаж байсан Сергей Елисеев засгийн газрыг тэргүүлэхээр болсон байна. Түүний орлогчоор Орос үндэстэн болон Херсон мужийн оршин суугч болох хүмүүс томилогджээ.

Херсон муж нь Украины өмнөд хэсэгт оршдог бөгөөд Крымтэй хиллэдэг.

Гуравдугаар сарын дундуур Оросын хүчин тус бүс нутгийг бүрэн хяналтандаа авсан тухай Оросын Батлан ​​хамгаалах яам мэдэгдэж байв. Харин дөрөвдүгээр сарын сүүлээр тэнд цэрэг-иргэний захиргаа байгуулагдаж, дараа нь бүс нутгийн эрх баригчид Орост нэгдэх төлөвлөгөөгөө зарласан юм.

Эх сурвалж: Tass