Байнгын хорооны дарга М.Мандхай НҮБ-ын Хүнс, хөдөө аж ахуйн байгууллагын Монгол дахь суурин төлөөлөгчтэй уулзав

Улсын Их Хурлын Байгаль орчин, хүнс, хөдөө аж ахуйн байнгын хорооны дарга М.Мандхай өнөөдөр /2026.10.29/ НҮБ-ын Хүнс, хөдөө аж ахуйн байгууллагын Монгол дахь суурин төлөөлөгч Чинюнь Дяо болон Европын Холбооны санхүүжилтээр НҮБ-ын Хүнс, хөдөө аж ахуйн байгууллагаас хэрэгжүүлж байгаа СТРИЙМ+ төслийн хууль, бодлогын мэргэжилтэн Б.Алтанцэцэг нарыг хүлээн авч уулзав.

Уулзалтаар талууд хүнс хөдөө аж ахуйн байгууллага болон Монгол Улс хөдөө аж ахуйн тогтвортой хөгжлийг бэхжүүлэх чиглэлээр цаашдын хамтын ажиллагааны талаар санал солилцлоо.

Мөн Монгол Улсын хөдөө аж ахуйн салбарын хөгжлийг бэхжүүлэх, малчид, тариаланчдад үзүүлэх дэмжлэгийг сайжруулах асуудлыг хөндөж, улмаар хөдөө аж ахуйн нэмүү өртгийн сүлжээг тогтвортой хөгжүүлэх, ялангуяа ноолуур, ноос, чацаргана, ингэний сүү зэрэг Монголын онцлог бүтээгдэхүүний үйлдвэрлэл, боловсруулалт, гадаад зах зээлд гарах боломжийг нэмэгдүүлэх болон мал аж ахуйн бусад бүтээгдэхүүний үйлдвэрлэл, боловсруулалтын чадавх, зах зээлд нэвтрэх боломжийг нэмэгдүүлэх, хувийн хэвшлийн оролцоог өргөжүүлэх асуудлаар санал солилцов.

Түүнчлэн нотолгоонд суурилсан бодлого боловсруулах, үр дүнд чиглэсэн төлөвлөлт, төсвийн үр өгөөжийг сайжруулах, хөдөө аж ахуйн салбарын хууль тогтоомжийн хэрэгжилтийг хангах асуудлын талаар санал солилцов. Судалгаа, мэдээллийг бодлого боловсруулахад үр дүнтэй ашиглах, техникийн хамтын ажиллагааг бэхжүүлэх, салбарын бодлого, хөрөнгө оруулалтыг хэмжигдэхүйц хөгжлийн үр дүнтэй уялдуулахын чухлыг талууд тэмдэглэж, бодлого боловсруулахад мэргэжилтэн, судалгааны байгууллага, мэргэжлийн сүлжээнүүдийн оролцоог нэмэгдүүлэх, салбарын тулгамдсан асуудлыг шийдвэрлэх бодитой арга замыг тодорхойлох боломжийн талаар хөндөн ярилцлаа.

Улсын Их Хурлын Байгаль орчин, хүнс, хөдөө аж ахуйн байнгын хороо

Эх сурвалж: Парламент