АНУ болон Иран харилцан цохилт өгч, Ойрх Дорнодод нөхцөл байдал эрс хурцадлаа

АНУ-ын зэвсэгт хүчин Ираны нутаг дэвсгэр дэх цэргийн байгууламжуудад чиглэсэн агаарын цохилтын шинэ давалгааг эхлүүлсэн талаар АНУ-ын Төв командлал мэдээллээ. Үүний хариуд Ираны талаас бүс нутаг дахь АНУ-ын цэргийн баазууд руу пуужин болон дроноор цохилт өгснөөр талуудын хооронд байгуулсан хоёр сарын хугацаатай гал зогсоох тохиролцоо цуцлагдахад хүрч магадгүй болов. 

Гэрэл зургийг REUTERS агентлагийн эрхтэйгээр нийтлэв.

АНУ-ын Ерөнхийлөгч Дональд Трамп Ираны талыг энхийн хэлэлцээр байгуулах үйл явцыг санаатайгаар сунжруулж байна хэмээн буруутгаж, "Тэд хэтэрхий удаалаа, одоо үр дагаврыг нь амсах болно" хэмээгээд Тегераныг бууж өгөх хүртэл довтолно үргэлжлүүлнэ гэж онцолсон байна.

АНУ-ын Төв командлалын мэдээлснээр, Тэнгисийн цэргийн хүчин болон Агаарын цэргийн хүчний сөнөөгч онгоцууд Ираны өмнөд хэсэг, тэр дундаа Ормузын хоолой орчмын Кешм арал, Бандар-Аббас, Сирик, Жаск зэрэг боомт хот дахь Ираны агаарын довтолгооноос хамгаалах систем, радарын станцууд болон холбооны сүлжээний байгууламжуудыг онилон цохилт өгчээ.

Харин Ираны Исламын хувьсгалт гварди үүний хариуд бүс нутаг дахь АНУ-ын цэргийн баазууд руу бөөнөөр нь пуужин болон дрон харвасан байна. Тухайлбал, Бахрейн дахь АНУ-ын Тэнгисийн цэргийн байр, Кувейт дэх "Али аль-Салем" агаарын бааз, Йордан дахь АНУ-ын "Аль-Азрак" нисэх баазыг онилон довтолжээ.  Бахрейн, Кувейт, Йорданы агаарын довтолгооноос хамгаалах системүүд Ираны пуужингуудын ихэнхийг нь устгасан аж. 

Мөргөлдөөн ширүүссэнтэй холбогдуулан Ираны зэвсэгт хүчний дээд командлалаас Ормузын хоолойг бүрэн хааж, нэвтрэхийг оролдсон ямар ч усан онгоц руу гал нээх болно гэдгээ албан ёсоор мэдэгдлээ. Ираны хэвлэлүүдийн мэдээлснээр, тус хоолойгоор гарах гэж байсан хоёр хөлөг онгоц хэдийнэ халдлагад өртөөд байна.

Эх сурвалж: Reuters