ЯРИЛЦЛАГА

Б.ЖИГЖИД: Ажил хаясан 30 хүнийг халаагүй, тохиролцоонд хүрсэн

Гэрэл зургийг MPA.mn

“Тавантолгой түлш” компанийн ажилчид урамшуулал болон үндсэн цалин олгоогүй, ажиллах орчин нөхцөл хангалтгүй зэрэг хэд хэдэн шалтгааны улмаас өнгөрсөн пүрэв гарагаас ажил хаялт зарласан. Энэ талаар болон шахмал түлшний хангамжийн асуудлаар тус компанийн Баруун бүсийн үйлдвэр хариуцсан захирал Б.Жигжидээс тодрууллаа.

-“Тавантолгой түлш” компанийн ажилчид хэд хэдэн шалтгааны улмаас ажил хаялт зарласан. Улмаар танай компаниас ажилчидтайгаа 300 мянган төгрөгөөр тохиролох саналтай байгаа гэх мэдээлэл гарсан. Үүнд тайлбар мэдээлэл өгөхгүй юү?

-Ажилчидтайгаа 300 мянган төгрөгөөр тохиролцох гэсэн юм байхгүй. Ажил хаялт зарлахаас өмнөх долоо хоногт бүх үйлдвэрийн ажилчидтай тусгайлан уулзсан. Өнгөрсөн есдүгээр сард үндсэн цалингийн 40 хувь хүртэлх урамшуулал олгох тухай ажилчдадаа хэлсэн. Мөн үндсэн цалин олгодог үед улирлын урамшуулал олгодог. Үүнийг аравдугаар сард олгоно гэж зохион байгуулсан. Тухайн үед цалингаа аваад ажлаас гарч байсан 2-3 хүн сүүлийн ээлжинд гардаг өдрөө бусад ажилчдыг уриалж, ажил хаялт зохион байгуулсан. Үүнтэй холбоотойгоор тухайн өдөр үйлдвэр ажиллаагүй гэх мэдээ гарсан. Тэр өдөр манай компанийн үйлдвэр хэвийн ажилласан. Үйлдвэрлэл зогссон асуудал байхгүй.

-Ажил хаялт зарласан, хэвлэл мэдээлэлд ярилцлага өгсөн 30 хүнийг халах тухай мэдээлэл гарсан. Энэ үнэн үү?

Баруун бүсийн үйлдвэр хариуцсан захирал Б.Жигжид.

-Үгүй. Тийм асуудал байхгүй. Ажилчид маань бүгдээрээ ажлаа хийж байгаа. Зохион байгуулсан хоёр, гурван хүн өнөөдөр өглөө гүйцэтгэх захиралтай уулзаж, ажилдаа орох саналтай байгаагаа илэрхийлсэн. Ингээд маргаашнаас ээлжиндээ ажиллана.

-Ажил хаялт зарласан иргэд “Тавантолгой түлш” компани тоног төхөөрөмжийн асуудал багагүй байдаг. Хэрэв эвдлэх юм бол өөрсдөө төлөөрэй гэх асуудлыг байнга хэлж, дарамталдаг тухай мэдээлсэн. Ийм асуудал үнэхээр байдаг уу?

-Үйлдвэр учраас эвдрэл мэдээж гарна. Эвдрэлийг цаг тухайд нь засварладаг.

-Үйлдвэрлэлийн осол хэр их гарч байна вэ?

-Өнгөрсөн хавар үйлдвэрлэлийн осол гарсан тухай та бүхэн мэдэж байгаа байх. Түүнээс хойш гар хуруу эсгэх, зүсэх зэрэг асуудал өдөр тутмын үйл ажиллагаанд гарч байгаа. Нэг дор 700 гаруй хүн ажиллаж байгаа шүү дээ. Иймд манай ХАБ-ын мэргэжилтнүүд давтан зөвлөгөө, сургалтыг тогтмол явуулж байгаа.

-Сүүлийн үед шахмал түлшний хангамжийн асуудал их яригдаж байна. Ер нь шахмал түлшний нөөц хэр байгаа вэ. Өнгөрсөн жилийн мөн үеийг бодвол нөөц бага байгаа талаарх мэдээлэл байгаа?

Цар тахлын нөхцөл байдлаас шалтгаалан үйлдвэрлэлийн урсгал засвар оройтож эхэлсэн. Гэсэн ч манай үйлдвэр наймдугаар сарын 2-ноос тасралтгүй ажиллаж, 72 мянган тонн аюулгүйн нөөц бүрдүүлээд байна.

Энэ нөөц нийслэлчүүдийн 21 хоногийн хэрэгцээг хангана. Гэхдээ энэ нөөцийг бид нэн шаардлагатай үед гаргадаг. Тухайлбал, эрчим хүч тасалдах, үйлдвэрлэлийн шугам ажиллахгүй байх зэрэг тохиолдолд гаргадаг.

Өнөөдрийн байдлаар үйлдвэрлэл шахмал түлш борлуулах 281 цэгээр дамжуулан шахмал түлшийг үйлдвэрээс шууд гаргаж байгаа.

-Нэг удаадаа хэчнээн тонн шахмал түлшийг борлуулах цэгүүдэд олгож байна вэ?

-Борлуулалтын цэгүүд урьдчилсан төлбөрт зарчмаар ажилладаг. Өмнөх өдөр нь борлуулагч захиалга өгдөг. Өнөөдрийн байдлаар 5-20 хүртэлх тонн шахмал түлшийг борлуулалтын цэгүүдэд нийлүүлж байна.

-Нэг цэгт 200 шуудай шахмал түлш нийлүүлдэг бөгөөд энэ нь нэг айлд гурван шуудай болно гэсэн үг. Энэ нь хангалтгүй байгаа талаар иргэд хэлж байна. Цаашид борлуулалтаа өсгөх үү?

-Бид цаашид борлуулалтаа өсгөх бодлого барьж ажиллана. Цэгүүдийн тоог шат дараатайгаар нэмэгдүүлж ойрын хугацаанд 450 цэг ажиллуулж эхэлнэ. Тухайн борлуулалтын цэгийн эрэлт, хүн амын нягтаршилд үндэслэн нийлүүлэлт хийдэг. Тухайлбал, ачаалал ихтэй борлуулалтын цэгт 20 хүртэлх тонн шахмал түлш нийлүүлж байна. Иймд ойрын өдрүүдэд шахмал түлшний урт дараалал, иргэдин бухимдал багасна гэж үзэж байгаа.

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet