Бангладешт сургалтын онгоц сургуулийн кампус руу унаж 20 хүн амь үрэгджээ

Бангладешийн нийслэл Дакка хотод сөнөөгч онгоц осолдож, сургуулийн кампус руу унасны улмаас 20 хүн амиа алдаж, 164 хүн шархадсан байна. Тус улсын агаарын хүчний “F-7 BGI” загварын сургалтын онгоц Даккагийн Курмитола баазаас хөөрсний дараа техникийн саатал гарч осолджээ. Ослын улмаас гарсан галд коллежийн байрууд ч өртөж, олон хүн түлэгдэж гэмтсэн аж.

Гэмтсэн, бэртсэн хүмүүсийг эмнэлэгт хүргэсэн бөгөөд тэдний дунд бага ангийн сурагчид ч байгаа юм. Хууль сахиулагчид, мэргэжилтнүүд ослын нарийн шалтгааныг тогтоохоор ажиллаж байна. “F-7 BGI” онгоцыг Хятадын “Chengdu” компани үйлдвэрлэсэн бөгөөд Зөвлөлтийн МиГ-21 онгоцны лицензээр бүтсэн хамгийн сүүлийн загвар юм. Бангладеш 2011 онд ийм 16 онгоц худалдан авчээ. 

Эх сурвалж: Reuters