ГЭРЭЛ ЗУРАГ

ФОТО: Монгол, Оросын 1,600 алба хаагчийн төлөөлөл ЗХУ-ын баатар, маршал Г.К.Жуковын хөшөөнд хүндэтгэл үзүүллээ

2021-09-30

Гэрэл зургийг
MPA.mn

Зэвсэгт хүчний Хуурай замын цэргийн штабын дарга, бригадын генерал Л.Онцгойбаяр, ОХУ-ын Дорнодын цэргийн тойргийн 36 дугаар армийн командлагчийн үүрэг гүйцэтгэгч, хошууч генерал И.Б.Тимофеев тэргүүтэй Монгол, Оросын цэрэг, дайчид өнөөдөр (2021.09.30) ЗХУ-ын баатар, маршал Г.К.Жуковын хөшөөнд хүндэтгэл үзүүлж, цэцэг өргөв. Уг ёслолын арга хэмжээг Монгол-Орос цэргийн дипломат харилцаа тогтоосны 100, Зэвсэгт хүчний 100 жилийн ой болон хоёр улсын хамтарсан “Сэлэнгэ-2021” байлдааны буудлагатай тактикын хээрийн сургалтыг тохиолдуулан зохион байгуулж буй аж.

Хүндэтгэл үзүүлэх ёслол 11:00 цагт эхэлж, Г.К.Жуковын хөшөөний баруун талаас хүндэт харуулууд үлээвэр хөгжмөөр Орос, Монгол хоёр улсын төрийн дууллыг эгшиглүүлэв. Үүний зэрэгцээ зүүн талаас Оросын цэрэг, дайчид нэгэн командын дор жагсаалын алхаагаар орж ирлээ. Уг ёслолын арга хэмжээг сонирхон үзэх иргэд гар утсаараа бичлэг хийн зогсоно. Г.К.Жуковын хөшөөны урд зогсох Орос, Монгол цэргүүд гартаа сарнай барин урагш алхаж, хүндэтгэл үзүүлэв.

Зэвсэгт хүчний Хуурай замын цэргийн штабын дарга, бригадын генерал Л.Онцгойбаяр “Монгол Улс, ОХУ-ын Зэвсэгт хүчний хамтарсан “Сэлэнгэ-2021” сургуулилт арав дахь жилдээ зохион байгуулагдаж байна. Уг сургуулилт хоёр улсын цэргийн дипломат харилцаа тогтоосны 100, Ардын хувьсгалын 100, Зэвсэгт хүчний 100 жилийн ойтой давхардаж буйгаараа онцлогтой. ОХУ-ын Дорнод цэргийн 36 дугаар тойргоос цөөнгүй алба хаагчид уг сургуулилалтад оролцохоор ирсэн учир ЗХУ-ын баатар, маршал Г.К.Жуковын хөшөөнд хүндэтгэл үзүүлж, Цэргийн болон Жуковын музейг үзүүлье гэж зорилоо. ОХУ-ын шилдэг цэрэг, дайчид генералуудтайгаа ирж Халх голын дайны үед Монгол, ЗХУ-ын цэргийн бүлэглэлийг удирдаж байсан домогт жанжин, Дэлхийн II дайны домогт маршал Г.К.Жуковын хөшөөнд цэцэг өргөж байгаад баяртай байна. Монгол Оросын цэрэг, дайчдын нөхөрлөл үеийн үед мөнхжин батжихын ерөөл өргөж, энэ өдрийн арга хэмжээг зохион байгууллаа” гэв.

“Г.К.Жуковын хөшөөг өдийг хүртэл хамгаалж, хүндэтгэл үзүүлж байгаад баяртай байна”

Харин ОХУ-ын Дорнодын цэргийн тойргийн 36 дугаар армийн командлагчийн үүрэг гүйцэтгэгч, хошууч генерал И.Б.Тимофеев “ОХУ, Монгол Улсын Зэвсэгт хүчин 2011 оноос жил бүр хамтарсан сургуулилалт зохион байгуулж байна. Энэ жилийн хамтарсан сургуулилалтын хүрээнд хоёр орны цэрэг, дайчдад ялалт авчирсан маршал Г.К.Жуковын хөшөөнд хүндэтгэл үзүүллээ. Уг арга зохион байгуулсанд мөн түүний хөшөөг өдгөөг хүртэл хамгаалж, хүндэлж байгаад их баяртай байна” хэмээн ярилаа.

Г.К.Жуковын хөшөөнд хүндэтгэл үзүүлэх ёслолын арга хэмжээ ийн өндөрлөж, тэд Монгол Цэргийн музейг үзэхээр цааш явав. Уг ёслолд оролцсон орос, монгол цэргүүд “Сэлэнгэ-2021” хамтарсан сургуулилалтад оролцож буй 1,600 алба хаагчийн төлөөлөл юм. Тодруулбал, уг сургуулилтад оросын Зэвсэгт хүчний 700 цэрэг, монголоос 700, Армийн нисэхийн 100 гаруй багийн бүрэлдэхүүн оролцож байна. Энэ сарын 23-нд нээлтээ хийсэн “Сэлэнгэ-2021” хамтарсан сургуулилалт Төв аймгийн Зэвсэгт хүчний 016 дугаар ангийн Сургалтын төв районд зохион байгуулагдаж буй бөгөөд ирэх аравдугаар сарын 5-ныг хүртэл үргэлжлэх аж. Уг сургуулилтын хаалтын буудлага аравдугаар сарын 4-нд болох бөгөөд Ерөнхий сайд Л.Оюун-Эрдэнэ оролцох гэнэ. “Сэлэнгэ-2021” сургуулилт “Террорист үйлдлийн сөрөг тусгай ажиллагаанд бэлтгэх, зохион байгуулж явуулах” сэдвээр явагдаж байгаа бөгөөд бүс нутгийн аюулгүй байдлыг хангахад хоёр улсын Зэвсэгт хүчний оролцоог нэмэгдүүлэх, цэрэг техникийн хамтын ажиллагааг хөгжүүлэх, цэргийн алба хаагчид харилцан туршлага солилцох боломжийг нэмэгдүүлдгээрээ чухал ач холбогдолтой аж.