НИЙГЭМ

Энэ сарын 27-30-нд ОХУ болон БНХАУ-аас нийт 9,750 орчим тонн АИ-92 автобензин нийлүүлнэ

Аи-92 автобензиний хангамжийг бусад эх үүсвэрээс хангах, нөөцийг нэмэгдүүлэх хүрээнд БНХАУ-ын “Петрочайна Интернэйшнл” ХХК-ийн Хөх хотын газрын тос боловсруулах үйлдвэрээс 43,440 тонн шатахуун / автобензин 33,300 тонн, дизелийн түлш 10,140 тонн/ шатахуун худалдан авах захиалга өгсөн талаар УУХҮЯ-наас мэдээлсэн.

Хятад улсаас импортлох 724 вагоныг төмөр замын хуваарьт оруулах, төмөр замын тээвэрлэлтийг саадгүй, шуурхай гүйцэтгэх, Замын-Үүд боомтоор яаралтай татан авах асуудлаар Гадаад харилцааны яам, Зам, тээврийн хөгжлийн яам, Монгол Улсаас БНХАУ-д суугаа элчин сайдын яам, Улаанбаатар төмөр зам, Шингэн түлш шилжүүлэн ачих байгууламж болон бусад холбогдох байгууллагуудтай хамтран, холбогдох арга хэмжээг авч ажиллаж байгаа аж.

Үүний үр дүнд Хятадын тал Монгол Улс руу шатахуун тээвэрлэх 150 вагоныг тус улсын есдүгээр сарын төмөр замын хуваарьт нэмэлтээр оруулж, шуурхай хамтран ажилласан ба эхний 2750 тонн АИ-92 автобензин ачсан 50 вагон энэ сарын 25-ны орой Хөх хотоос хөдөлж, 26-ны өдөр Зам-Үүд боомтоор орж ирсэн ба өчигдөр оройноос шилжүүлэн ачих ажил хийгдэж, 25 вагоныг шилжүүлэн ачиж дууссан байна.

Хоёр дахь ээлжийн АИ-92 автобензин ачсан 50 вагон энэ 26-ны өдөр буюу өчигдөр орой Хөх хотоос хөдөлсөн ба ойролцоогоор өнөөдөр 11-12 цагийн үед Эрээн боомтод ирж, үдээс хойш 17 цагийн орчим хилээр оруулж ирэх төлөвлөгөөтэй байна.

Хөх хотын боловсруулах үйлдвэр дээр дараагийн ээлжийн 50 вагоны ачилт хийгдэж байгаа ба ачиж дуусмагц Эрээн боомт руу яаралтай хөдөлгөх талаар Хятадын талын холбогдох байгууллагатай хамтран ажиллаж байгаа гэнэ.

БНХАУ-аас есдүгээр сард багтаж гурван удаагийн ачилтаар 150 вагон нийт 8,250 тонн аи-92 автобензин импортоор орж ирэх юм.

Мөн 23-ны өдөр ОХУ-ын “Роснефть” компанитай хийсэн уулзалт, хэлэлцээрийн үеэр есүгээр сард яаралтай нийлүүлэхээр тохирсон 1500 тонн АИ-92 автобензиний эхний ээлж буюу 1210 тонн АИ-92 автобензин ачсан 20 вагон өчигдөр буюу энэ сарын 26-27 шилжих шөнө Улаанбаатар хотын Толгойт өртөөнд ирсэн ба яг одоо шатахууны агуулахууд руу хуваарилж дууссан. Үлдсэн 300 орчим тонн АИ-92 автобензин ачсан 5 вагон үйлдвэрээс ачигдан замдаа явж байна.

Энэ сарын 27-30-ны өдрүүдэд ОХУ болон БНХАУ-аас нийт 9,750 орчим тонн АИ-92 автобензин орж ирэх ба энэ манай улсын АИ-92 автобензиний ердийн найм хоногийн нөөц юм.

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet