COVID-19

Байден АНУ-ын хандивлах ковидын вакцины тунг хоёр дахин нэмэгдүүлэв

Ерөнхийлөгч Жо Байден КОВАКС хөтөлбөрийг дэмжиж байгаагаа илэрхийлж, дэлхийн хүн амын 70 хувийг вакцинжуулах зорилгод хүрэхийн тулд АНУ-ын хандивлах вакцины хэмжээг хоёр дахин нэмэгдүүлж нэг тэрбум тун болгож байгаагаа лхагва гарагт мэдэгдэв.

АНУ-ын нэмэгдүүлсэн үүрэг амлалт нь НҮБ-ын Ерөнхий Ассамблейн дэргэд зохион байгуулагдсан дэлхийн вакцинжуулалтын дээд хэмжээний уулзалтын үндэс суурь болж, Байден чинээлэг үндэстнүүдийг коронавирусийг хяналтандаа авахын тулд илүү ихийг хийхийг уриалав.

“Дэлхийн эрүүл мэндийн аюулгүй байдал өнөөг хүртэл бүтэлгүйтэж ирсэн бөгөөд бид 4.5 сая хүний амийг аварч чадаагүй. Энэ тоо нэмэгдсээр байна. Бидэнд Ковид-19-ийн эсрэг үр дүнтэй вакцин бий. Бид цар тахлыг зогсоож чадна” гэж НҮБ-ын Ерөнхий нарийн бичгийн дарга Антонио Гутерриш дээд хэмжээний уулзалтад хэлжээ.

АНУ амласан тунгаа 500 саяар нэмснээр 2022 он гэхэд тус улсын хандивлах нийт вакцины тун 1.1 тэрбум гаруй болох юм. АНУ-аас өмнө нь нийлүүлсэн 160 сая орчим тунг 100 гаруй оронд тараасан ба энэ нь дэлхийн бусад орнуудын хандивыг нэгтгэснээс өндөр үзүүлэлт юм.

Түүнчлэн Байден бусад орнуудыг хандивлах вакцины хэмжээгээ нэмэгдүүлэхийг, мөн чинээлэг улс орнуудыг ядуу буурай орнуудад вакцин худалдахаас илүүтэй хандив өргөхийг уриалав.

Сүүлийн нэг жилийн хугацаанд дэлхий даяар 5.9 тэрбум гаруй ковидын вакцин хийсэн нь дэлхийн хүн амын 43 орчим хувийг эзэлж байна. Гэхдээ хуваарилалтын хувьд асар их ялгаа байгаа бөгөөд орлого багатай улс орнууд хүн амынхаа хамгийн эмзэг бүлгийг ч вакцинжуулж чадаагүйгээр зогсохгүй зарим улсад вакцинжуулалтын түвшин ердөө 2-3 хувь байна.

Дэлхийн Эрүүл Мэндийн Байгууллага чинээлэг орнуудын амласан хандивын вакцины ердөө 15 хувийг шаардлагатай газруудад хүргэсэн болохыг мэдэгдээд, улс орнуудыг амлалтаа нэн даруй биелүүлэхийг хүсэв.

Эх сурвалж: AP

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet