Лос-Анжелес хотын ойролцоо шинэ хээрийн түймэр дэгдсэн нь хурдацтай тархаж байна

Лос-Анжелесийн орчимд шинэ хээрийн түймэр дэгдсэн нь хурдацтай тархаж байгаа бөгөөд бүс нутагт нүүлгэн шилжүүлэх ажил эхэлжээ.

Лхагва гарагийн үдээс хойш хотын хойд хэсэгт, хэд хэдэн орон сууцны хороолол, сургуультай хиллэдэг уулархаг бүсэд Кастаик нуурын ойролцоо Хьюз орчимд гал түймэр гарсан байна. 

Хүчтэй салхины нөлөөгөөр түймэр хоёрхон цагийн дотор 5,000 гаруй акр талбайг хамарчээ. Одоогоор ямар нэгэн байшин барилга, аж ахуйн нэгжид хохирол учраагүй байна. Шинээр дэгдсэн гал түймэр нь Лос Анжелесийн олон хорооллыг устгасан хоёр томоохон түймрийн хойд хэсэгт дүрэлзэж байгаа аж.

Мөн өмнөд хэсэгт Сан Диего болон Оушенсайдын ойролцоо өөр хоёр түймэр гарсан байна. Оушенсайдын ойролцоох түймэр 85 акр, Бернардогийн түймэр 3.9 акр талбайг хамарсан - хоёул жижиг хэмжээтэй боловч суурьшлын бүс аж. Албаны хүний мэдэгдсэнээр хоёр гал түймрийг цурамд оруулсан байна.

Хуурайшилт ихтэй Хьюз орчимд салхины хурд 30-40 км/цаг байгаа ба цаашид ширүүсэх төлөвтэй байгаа аж. Гал түймэр хурдацтайгаар тархаж байгаа ч цаашид улам бүр нэмэгдэж, агаарын багийнханд ажиллагаагаа үргэлжлүүлэхэд хүндрэл учирч болзошгүй байна. 

Калифорни муж улсын гал түймэртэй тэмцэх агентлагаас мэдээлснээр гал түймэр дэгдсэн газар нь хүн ам ихтэй биш боловч гал хүчтэй салхины нөлөөгөөр Кастаик нуур руу чиглэж байгаа аж. Хэрэв нууранд хүрвэл 20,000 орчим оршин суугчтай Кастаик бүс эрсдэлд орох гэнэ.

Эх сурвалж: BBC