Нидерланд улс нацистуудтай хамтран ажиллаж байсан байж болзошгүй 425,000 хүний ​​нэрийг цахимжуулжээ

Германчууд Нидерландыг эзлэн түрэмгийлж байх үед нацистуудтай хамтран ажиллаж байсан байж магадгүй 425,000 орчим хүний ​​нэрийг цахимжуулжээ.

Эдгээр нь Дэлхийн II дайны төгсгөлд тусгай мөрдөн байцаалтын хүрээнд шалгагдсан хүмүүс бөгөөд тэдний 150,000 гаруй нь ямар нэгэн шийтгэл хүлээсэн байна.

Мөрдөн байцаалтын бүрэн бүртгэлийг өмнө нь зөвхөн Гааг дахь Нидерландын үндэсний архивд очиж үзэх боломжтой байжээ.

Архивыг дижитал хэлбэрт шилжүүлсэн Гюйгенсийн хүрээлэнгийн хэлснээр энэ нь 1940-1945 он хүртэл үргэлжилсэн Нидерландын эзлэн түрэмгийллийн талаар судлах хүсэлтэй хүмүүст томоохон саад болдог байв. 

“Энэ архив нь одоогийн болон ирээдүй хойч үеийнхний хувьд чухал түүхүүдийг агуулдаг. Аав нь дайны үед юу хийдэг байсныг мэдэхийг хүсдэг хүүхдүүдээс эхлээд энэ саарал үеийг судалж буй түүхчдэд хүртэл хэрэгтэй” гэж хүрээлэнгээс гаргасан мэдэгдэлд өгүүлжээ. 

Архивд дайны гэмт хэрэгтнүүд, Германы зэвсэгт хүчинд элссэн 20,000 орчим Нидерландын иргэн, Нидерланд дахь Нацист нам буюу Үндэсний Социалист Хөдөлгөөн (NSB)-ий гишүүдийн нэр багтсан байна. Гэм буруугүй нь тогтоогдсон хүмүүсийн нэрс ч мөн үүнд багтжээ.

Онлайн мэдээллийн сан нь зөвхөн сэжигтний нэрс, төрсөн огноо, төрсөн газар зэргийг агуулдаг бөгөөд зөвхөн тодорхой хувийн мэдээллийг ашиглан хайлт хийх боломжтой аж. 

Гэхдээ тухайн хүний гэм буруутай нь тогтоогдсон эсэх, ямар хэлбэрээр хамтран ажилласан гэж сэжиглэгдэж байсан талаар тодорхой мэдээлэл ороогүй байна. Харин Үндэсний архивын ямар файлаас энэ мэдээллийг олж авах боломжтойг зааж өгөх гэнэ.

Түүхэн эмзэг үетэй холбоотой хувийн мэдээллийг ил болгож байгаад зарим хүмүүс санаа зовниж байсан тул онлайнд нийтлэгдсэн мэдээллийг хязгаарлахад хүрсэн байна.

Мөн амьд байж магадгүй хүмүүсийг онлайн мэдээллийн санд оруулаагүй байна.

Эх сурвалж: BBC