ДЭЛХИЙН МЭДЭЭ

АНУ, Их Британи Австрали улсуудын байгуулсан “Aukus” гэрээ дэлхий дахинд эсэргүүцэлтэй тулгарч байна

АНУ, Их Британи улсууд Австралитай аюулгүй байдлын шинэ гэрээ байгуулсныхаа дараа олон улсын шүүмжлэлтэй тулгарч байна. Энэхүү хэлэлцээрийн хүрээнд АНУ, Их Британийн талууд цөмийн шумбагч онгоц бүтээх технологио Австралитай хуваалцах бөгөөд энэ нь Хятадыг дайнд өдөөж магадгүй гэсэн айдсыг төрүүлэв.

“Aukus” нэртэй уг түншлэлийг АНУ-ын Ерөнхийлөгч Жо Байден, Их Британийн Ерөнхий сайд Борис Жонсон, Австралийн Ерөнхий сайд Скотт Моррисон нар лхагва гарагт зарласан. Тэд мэдэгдэлдээ Хятадыг дурдаагүй боловч “Aukus” бол маргаан дагуулж буй Өмнөд Хятадын тэнгис дэх Бээжингийн нөлөөг эсэргүүцэх оролдлого гэж олон улсууд үзэж байна.

Өмнөх Ерөнхий сайд Тереза ​​Мэй уг хэлэлцээр Их Британийг Хятадтай дайтахад хүргэж болзошгүй эсэх, мөн Тайваньд Хятадууд халдсан тохиолдолд энэ түншлэлийг хэрхэн хариу үзүүлэх талаар Ерөнхий сайд Жонсоноос асуув.

Үүний зэрэгцээ, Австрали улстай байгуулсан олон тэрбум долларын шумбагч онгоцны гэрээг цуцалсанд Парис уурласан бөгөөд Вашингтон тэднийг тайвшруулахыг оролдов.

Францын Гадаад хэргийн сайд Жан-Ив Ле Дриан энэхүү мэдэгдлийг “ар нуруу руу хутгалсан” гэж нэрлээд, Ерөнхийлөгч асан Дональд Трампыг санагдуулсан “харгис, нэг талыг барьсан, урьдчилан тааварлах боломжгүй шийдвэр” гэж нэрлэжээ.

Түүнчлэн Вашингтон дахь Францын дипломатууд хариу арга хэмжээ авахын тулд АНУ, Францын харилцаа холбоо тогтоосны ой баярт зориулсан гала тоглолтыг цуцалсан байна.

Мөн Франц улсаас АНУ-д суугаа элчин сайд асан Жерар Арауд BBC-ийн “World Tonight” нэвтрүүлэгт оролцохдоо ” Энэ түншлэл болоод энэхүү стратегийн гэрээ нь Францын хувьд үндэсний ашиг сонирхол гэдгийг мэдэж байсан ч АНУ үүнийг үл тоолоо” гэжээ.

Тэгвэл АНУ-ын Төрийн нарийн бичгийн дарга Антони Блинкен Францыг тайвшруулахын тулд “амин чухал түнш” гэж нэрлээд Вашингтон Паристай “гайхалтай нягт хамтран ажиллагаагаа” үргэлжлүүлэх болно хэмээв.

Харин Цагаан ордны хэвлэлийн нарийн бичгийн дарга Жен Псаки “Францтай хамтарсан болон хамтраагүй олон түншлэлийн гэрээ байдаг. Тэд мөн биднийг оролцуулалгүйгээр бусад улсуудтай түншилдэг. Дэлхий дахинд дипломат ажил ингэж явагддаг” хэмээн Францын шүүмжлэлийг үл тоожээ.

Холбоотнууд кибер чадавх, хиймэл оюун ухаан болон усан доорх технологийг хуваалцах энэхүү түншлэлийг Их Британийн үндэсний аюулгүй байдлын зөвлөх Стивен Ловергов “сүүлийн жаран жилийн хугацаанд байгуулсан дэлхийн хамгийн чухал хамтын ажиллагааны гэрээ” гэж тодорхойлсон байна.

Харин түншлэлийн талаар Хятадын төрийн мэдлийн Global Times сонин цөмийн шумбагч онгоцнуудын зэвсгийн уралдааны тухай анхааруулж, Австралийн цэргүүд Хятадын “эсрэг довтолгоонд” хамгийн түрүүнд амь үрэгдэх магадлалтай гэв.

Австралийн Батлан хамгаалахын сайд Питер Даттон Бээжингийн энэ хариу үйлдлийг няцаагаад “Бид Энэтхэг-Номхон далайн хөршүүдтэйгээ тогтвортой энх тайвныг баталгаажуулахын төлөө ажилладаг бөгөөд энэхүү хамтын ажиллагаагаар бүс нутгийг аюулгүй болгохыг зорьж байна. Энэ бол бодит байдал бөгөөд ямар ч суртал ухуулга энэ баримтыг үгүйсгэж чадахгүй” гэжээ.

Эх сурвалж: BBC

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet