Трамп сонгуулиас хойших анхны гадаад айлчлалаараа Нотр-Дамын нээлтэд оролцоно

АНУ-ын Ерөнхийлөгчөөр сонгогдсон Доналд Трамп бямба гарагт Парист зочилж, таван жилийн өмнө шатсан Нотр-Дамын сүмийг дахин нээх ёслолд оролцохоор болсноо мэдэгджээ.

Францын нийслэлийн нэгэн бэлэг тэмдэг болсон, хамгийн үнэ цэнтэй дурсгалт газруудын нэг болох готик хэв маягаар баригдсан Нотр-Дамын сүм нь энэ долоо хоногийн сүүлээр жуулчид болон католик шашинтнуудад дахин үүд хаалгаа нээх гэж байгаа юм.

Таван жилийн өмнө гарсан галын дараа XII зууны үед хамаарах сүмийг сэргээн засварлах ажил эхэлсэн бөгөөд уг томоохон төсөлд 2,000 орчим өрлөгчин, мужаан, сэргээн засварлагч, дээврийн ажилчид, цутгалтын ажилчид, урлагийн мэргэжилтнүүд, уран барималчид, инженерүүд оролцож, нийт 700 сая еврог зарцуулсан байна.

Арваннэгдүгээр сарын 5-нд болсон сонгуульд ялалт байгуулж, нэгдүгээр сарын 20-нд албан тушаалдаа орохоор бэлтгэж байгаа Трамп даваа гарагт өөрийн “Truth Social” платформ дээрээ Францын Ерөнхийлөгч Эммануэль Макроны засгийн газрыг магтжээ.

“Ерөнхийлөгч Эммануэль Макрон Нотр-Дамыг сүр жавхлантайгаар сэргээн засварлах гайхалтай ажлыг хийсэн. Энэ бол бүх хүмүүсийн хувьд онцгой өдөр байх болно!” гэж бичсэн байна.

Эх сурвалж: Reuters