Өмнөд Солонгосын ерөнхийлөгч Трамптай хийх уулзалтад бэлтгэн гольфоор хичээллэж эхэлжээ

Өмнөд Солонгосын Ерөнхийлөгч Юн Сук Ёол АНУ-ын ерөнхийлөгчөөр сонгогдсон Доналд Трамптай хийх уулзалтад бэлтгэж, сүүлийн найман жилийн хугацаанд анх удаа гольфоор хичээллэж эхэлсэн болохыг түүний ажлын алба мягмар гарагт мэдэгдэв.

Өмнөд Солонгосын хэвлэлд мэдээлснээр Юн бямба гарагт гольфийн талбайд зочилж, хамгийн сүүлд 2016 онд тоглосон спортоороо хичээллэсэн байна. 

“Ерөнхийлөгч Трамптай дотно харилцаатай олон хүн бид хоёрыг сайн тохирох болно гэж надад хэлж байсан” гэж Юн пүрэв гарагт болсон хэвлэлийн бага хурлын үеэр Трампын ялалтад утсаар баяр хүргэснийхээ дараа хэлжээ. 

Трампын засаг захиргааны хуучин албан тушаалтнууд болон нөлөө бүхий Бүгд найрамдах намын гишүүд шинэ ерөнхийлөгчтэй харилцаа холбоо тогтооход нь туслах санал тавьсан болохыг тэрээр нэмж хэлэв. 

Шинжээчид Юныг Трамптай хувийн харилцаа холбоо тогтоосноор Сөүлийн ашиг сонирхол гэх мэт үндэсний зорилтуудыг хэрэгжүүлэхэд ашиглаж магадгүй гэж үзэж байна.

Трамп хоёр дахь бүрэн эрхийн хугацаандаа “Америкийг нэгдүгээрт тавина” гэсэн зарчмыг гадаад бодлогодоо баримтлах төлөвлөгөөтэй байгаа бол Өмнөд Солонгосын компаниуд АНУ-тай хийх худалдаанаас ихээхэн хамааралтай байдаг.

Трампын анхны бүрэн эрхийн хугацаанд хоёр улс Солонгосын дайнаас хойш Өмнөд Солонгост байрлаж буй АНУ-ын 28,500 орчим цэргийн зардлыг хуваах эсэх асуудлаар зөрчилдөж байв. 

Трампыг ерөнхийлөгчийн сонгуульд ялалт байгуулсны дараа Сөүлийн албаны хүмүүс эдийн засгийн томоохон өөрчлөлтөд бэлтгэхээр ажиллаж байгаа бол Юн ням гарагт засгийн газар болон салбарын яриа хэлэлцээрт бэлтгэхийг холбогдох албан тушаалтнуудад даалгасан байна. 

Лондонгийн Кингс коллежийн Солонгосын асуудал эрхэлсэн мэргэжилтэн Рамон Пачеко Пардо Трамп, Юн хоёрын ижил төстэй зан чанар, хандлага нь тэднийг нөхөрсөг харилцаа тогтооход нөлөөлж магадгүй гэж үзэж байгаа ч зарим шинжээчид Өмнөд Солонгосыг сөрөг нөлөөллөөс ангид байлгахад хангалтгүй байж магадгүй гэж үзэж байна.

Эх сурвалж: Reuters