Сонгуулийн коллежид дөрвөн санал дутуу хэвээр байгаа ч Трамп өөрийг нь ерөнхийлөгчөөр сонгосонд талархал илэрхийлэв

Арваннэгдүгээр сарын 5-ны өдөр америкчууд дараагийн ерөнхийлөгчөө сонгохоор саналаа өгсөн.

Хэд хэдэн мужид санал тооллого үргэлжилсэн хэвээр байгаа ба Бүгд Найрамдах намын Доналд Трамп сонгуулийн коллежид 266 санал цуглуулаад байна. 

Харин түүний өрсөлдөгч Дэд ерөнхийлөгч Камал Харрис 195 саналтай байна.

Энэ өдөр Америкийн иргэд мөн Конгрессын гишүүдээ сонгосон бөгөөд Бүгд найрамдах нам Сенатад хяналтаа тогтоосон бол Төлөөлөгчдийн танхимын үр дүн гараагүй байгаа ч амжилттай явж байгааг намын гишүүд мэдээлжээ.

Трамп Флорида мужийн Вест Палм Бичд зохион байгуулагдаж буй сонгуулийн явцыг ажиглах арга хэмжээнийхээ үеэрээ гэр бүл, кампанит ажилд нь оролцсон хүмүүсийн хамтаар тайзан дээр гарч, мэдэгдэл хийлээ.

Тэрээр сонгуулийн коллегид дөрвөн санал дутуу хэвээр байхад түүнийг 47 дахь, мөн 45 дахь ерөнхийлөгчөөр сонгосон ард түмэндээ талархал илэрхийлсэн байна. 

Трамп цааш нь “Бид улс орноо эдгээхэд туслах болно” гээд, “Америк бидэнд урьд өмнө хэзээ ч байгаагүй, хүчирхэг мандат өгсөн” гэж нам нь Сенатад ялалт байгуулсан тухай дурдав.

Экс ерөнхийлөгч мөн гэр бүлийнхэндээ, тэр дундаа эхнэр Меланиагаа Тэргүүн хатагтай хэмээн нэрлээд, талархал илэрхийллээ. 

Арга хэмжээний үеэр Ж.Д.Вэнс мөн үг хэлсэн ба “Бид Америкийн Нэгдсэн Улсын түүхэн дэх хамгийн том улс төрийн эргэлтийн гэрч болсон гэж би бодож байна” гэж хэлэв.

Мөн Трамптай хамт “Америкийн түүхэн дэх хамгийн том эдийн засгийн эргэлтийг удирдана” гэж амласан байна.

Эх сурвалж: BBC