Гүржид олон мянган хүн сонгуулийн үр дүнг эсэргүүцэж жагслаа

2012 онд засгийн эрхэнд гарсан Гүржийн мөрөөдөл нам өнгөрсөн бямба гарагт болсон сонгуулиар бараг 54 хувийн санал авсан болохыг сонгуулийн хороо мэдэгдсэн боловч парламентад суудал авсан сөрөг хүчний дөрвөн гол нам сонгуулийн дүнг хүлээн зөвшөөрөхгүй гэдгээ илэрхийлж, танхимыг бойкотлохоо мэдэгдээд байгаа.

Сонгуулийн дүн гарсны дараа Ерөнхийлөгч Саломе Зурабичвили ард иргэдээ мөн гудамжинд гарахыг уриалсан юм.

Үүний дагуу даваа гарагт Тбилиси хотын парламентын гадаа олон мянган хүн жагсаж, барууны эрх баригчдыг мөрдөн байцаалт явуулахыг уриалав.

Жагсагчдын зарим нь Оросын эсрэг туг барьсан байжээ. Нийслэл Тбилиси хотын Зөвлөлтийн үеийн парламентын ордны урд талд “хулгайлсан” гэсэн бичиг байрлуулсан байсан ч цагдаа нар ажиглаж байсан тул ямар нэгэн мөргөлдөөн гараагүй байна.

Гүржийн иргэд парламентын сонгуулийг улс орны ирээдүйн чухал сонголт гэж үзэж байв. Нэг талд эрх баригч Гүржийн мөрөөдөл нам Оростой харилцаагаа улам гүнзгийрүүлэхийг эрмэлзэж байгаа бол сөрөг хүчин Европтой хурдан интеграцчилахыг эрмэлзэж байгаа. Гэвч Гүржийн эрх баригчид Оросын хууль тогтоомжоос хуулбарласан гадаадын төлөөлөгчдийн тухай хуулийг баталсны дараа ЕХ тус улсын нэр дэвшигчийн статусыг царцаасан юм.

Зурабичвили Гүрж болон Европын холбооны далбааг нөмрөн цугласан олонд хандан “Та бүхэн сонгуульд ялагдаагүй. Таны саналыг хулгайлсан, тэд таны ирээдүйг ч хулгайлахыг оролдсон. Өнөөдөр бид хамтдаа, тайван замаар өөрсдийнхөө эрхийг хамгаалах болно: таны саналыг хүндэтгэх үндсэн хуулиар олгогдсон эрхийг чинь хамгаалах болно” гэж хэлжээ.

Европын Аюулгүй байдал, Хамтын Ажиллагааны Байгууллагын ажиглагчид сонгуулийн дүнд нөлөөлөхүйц санал худалдаж авах, сонгогчдыг айлган сүрдүүлэх, саналын хуудас хууль бусаар саналын хайрцагт хийх зэрэг зөрчлүүдийг бүртгэснээ мөн мэдэгдээд байгаа.

НАТО болон Европын холбоо сонгуулийн үр дүнг яаралтай шалгахыг Гүржийн сонгуулийн хороонд уриалаад байна.

АНУ-ын зүгээс Европын холбоотнуудтайгаа ямар байгууллага зөрчлийн талаарх мэдээллийг шалгахад тохиромжтой гэдэг талаар ярилцаж байгааг Төрийн департаментын хэвлэлийн төлөөлөгч Мэттью Миллер мэдэгджээ.

Хэрэв Гүржийн засгийн газар “ардчиллын эсрэг үйлдлээсээ” татгалзахгүй бол тус улсын эрх баригч намын албан тушаалтнууд болон хэт барууны идэвхтнүүдийн эсрэг хориг арга хэмжээ авч, визний хориг тавьсан Вашингтон нэмэлт арга хэмжээ авч магадгүй гэж Миллер хэлсэн байна.

Эх сурвалж: Reuters