ГССҮТ: Японы эмнэлгүүдтэй хамтарсан мэс засал, сургалт, судалгаа шинжилгээ хийнэ

Гэмтэл согог судлалын үндэсний төвийн захирал Э.Галбадрах энэ сарын 02-ны өдөр Япон улсын “Seirei Hamamatsu” нэгдсэн эмнэлгийн захирал, хөл шагайн мэс заслын эмч, доктор Masanori Taki, Нагоя хотын АУИС-ийн төгсөлтийн дараах сургуулийн гэмтэл согогийн тасгийн их эмч, туслах профессор Myongsu Ha, “East Maebashi” гэмтэл согогийн эмнэлгийн захирал, Хөл шагайн мэс заслын төвийн дарга, доктор Naohiro Hio нарыг хүлээн авч уулзлаа. 

Тус уулзалтад дээрх зочид төлөөлөгчдөөс гадна ГССҮТ-ийн Насанд хүрэгсдийн мэс заслын тасгийн их эмч Г.Бадамгарав, Ш.Баасансүрэн болон албаны бусад хүмүүс оролцсон юм. 
Уулзалтын хүрээнд ГССҮТ-ийн үйл ажиллагаа, тусламж үйлчилгээг дэлгэрэнгүй танилцуулж, оношилгоо эмчилгээний сүүлийн үеийн арга технологийн талаар санал сэтгэгдлээ солилцсон бөгөөд хамтарч ажиллах чиглэлээр дараах зорилтуудыг ярилцсан байна. 

Тухайлбал, гэмтэл согогийн эмч мэргэжилтнүүдийг ГССҮТ болон Японы эмнэлгүүдэд харилцан сургаж чадавхжуулах, мэдлэг туршлагыг нэмэгдүүлэх, мөн тус улсын эмч, эрдэмтэн багш нартай хамтарсан мэс засал эмчилгээ хийх, хүнд хэлбэрийн буюу ховор тохиолдлын гэмтэл согог, эмчилгээний арга зүйн томоохон судалгаа шинжилгээ хийх чиглэлээр хамтын ажиллагааг өрнүүлэхээр боллоо.