Израил 2006 оноос хойш анх удаа Бейрутын төв хэсэгт цохилт өгчээ

Өнгөрсөн шөнө Израил Ливаны нийслэл Бейрутын төв хэсэгт орших Кола уулзварын ойролцоо агаарын цохилт өгсөн нь 2006 оноос хойш анх удаа өмнөд захын дүүргүүдээс өөр газарт өгсөн агаарын довтолгоо нь болжээ. Дэлбэрэлтийн чимээ хот даяар сонсогдсон байна.

Кола уулзвар нь Бейрут хотын хөл хөдөлгөөн ихтэй цэгүүдийн нэг аж. Цохилт болсон газраас авсан анхны зургуудаас харахад орон сууцны барилгын хоёр давхар нь бүхэлдээ агаарын цохилтод сүйрсэн байв. Нэг бичлэгт хүмүүс барилга руу гүйж байх ба дэлбэрэлтэд шидэгдсэн хүмүүсийн цогцсууд барилгын гаднах явган хүний ​​зам дээр хэвтэж байгааг харуулсан байна.

Уг цохилтоос өмнө Израил зөвхөн өмнөд захын дүүргүүдэд цохилт өгч байсан юм. Бейрутын төвд өгсөн цохилт нь Израилын агаарын дайралт өргөжин тэлж буйг илтгэж байгаа бөгөөд оршин суугчдыг нь аюулгүй байдлын талаар санаа зовниход хүргээд байна.

Аюулгүй байдлын албаны эх сурвалжийн мэдээлснээр наад зах нь хотын төвд болсон цохилтын улмаас хоёр хүн амиа алджээ.

Израилын арми агаарын довтолгооны талаар ямар нэгэн тайлбар хийгээгүй байна.

Ливаны эрх баригчдын мэдээлснээр сүүлийн 24 цагийн дотор Израилын агаарын довтолгооны улмаас дор хаяж 105 хүн амь үрэгдсэн ба нэг сая хүн буюу хүн амын тавны нэг нь гэр орноо орхин дүрвэжээ.

Харин сүүлийн хоёр долоо хоногт нийт 1,000 гаруй иргэн амиа алдаж, 6,000 гаруй хүн шархадсан гэж мэдээлсэн байна.

Эх сурвалж: The Guardian