Хүний тархинд чип суулгах хоёр дахь туршилт нь амжилттай үргэлжилж байгааг “Neuralink” мэдэгдэв

Саажилттай өвчтөнүүдэд дижитал төхөөрөмжийг бодлоороо удирдах боломжийг олгох зорилготой суулгацын хоёр дахь туршилт амжилттай болсныг тэрбумтан Илон Маскийн “Neuralink” компани мэдэгдэв.

Компанийн мэдээлснээр нэгдүгээр сард тархиндаа суулгац хийлгэсэн анхны өвчтөн болох Ноланд Арбаугаас ялгаатай нь “холболт салах” асуудал хоёр дахь туршилтын үеэр тулгараагүй байна.

Суулгацын жижиг холболтууд Арбаугийн мэс заслын дараа салж, тархины дохиог хэмжих электродуудын тоо эрс багассан юм. Хожим “Neuralink” суулгацын алгоритмыг илүү мэдрэмтгий болгох өөрчлөлтийг хийснээр Арбаугийн тархины дохиог хянах чадварыг сэргээж байв.

“Reuters” агентлагийн өмнө нь мэдээлж байснаар “Neuralink”-ийн амьтад дээр хийсэн туршилтын үеэр ижил асуудал гарч байсан аж.

Тус компани Алекс нэртэй хоёр дахь өвчтөндөө ижил төстэй асуудлаас урьдчилан сэргийлэхийн тулд мэс заслын үеэр тархины хөдөлгөөнийг багасгах, суулгац болон тархины гадаргуугийн хоорондох зайг хязгаарлах зэрэг арга хэмжээ авсан болохоо лхагва гарагт мэдэгдэв. 

“Neuralink”-ийн нугасны гэмтэлтэй хүмүүст туслах зорилготой төхөөрөмж туршилтын шатандаа явж байна. Энэхүү төхөөрөмжийн тусламжтайгаар эхний өвчтөн видео тоглоом тоглох, интернэтээр хэсүүчлэх, олон нийтийн сүлжээнд нийтлэл бичих, зөөврийн компьютер дээрээ курсорыг хөдөлгөх боломжтой болсон.

Өнгөрсөн сард тус компани хоёр дахь өвчтөнд уг төхөөрөмжийг суулгасан бөгөөд өвчтөн төхөөрөмжийг ашиглан видео тоглоом тоглож, 3D объект зохион бүтээх аргад суралцаж байгаа аж.

Эх сурвалж: Reuters